Վարչապետը սանկցիաներ է կիրառել Դավիթ Հարությունյանի նկատմամբ. «Հրապարակ»

«Հրապարակ» թերթը գրում է. «Վարչապետ Կարեն Կարապետյանը ոչ միայն Դավիթ Հարությունյանին իջեցրել է իր աստղային բարձունքից եւ հասկացրել, որ վունդերկինդների ժամանակներն անցել են, այլեւ սկսել է սանկցիաներ կիրառել նրա նկատմամբ: Մեր տեղեկություններով` վարչապետը վերցրել է Դավիթ Հարությունյանին սպասարկող երկու մեքենաները եւ դրա փոխարեն տրամադրել «Պրադո»:

Բանն այն է, որ տարիներ ի վեր կառավարության աշխատակազմի ղեկավար-նախարարն ունեցել է երկու ծառայողական մեքենա` Honda CR-V եւ BMW 523, եւ, որպես արտոնյալի, օպտիմալացումները, մեքենաների կրճատումները շրջանցել են նրան: Եվ, ահա, պարզվում է՝ վարչապետը նման կոմպլեքսներ չունի։ Նա Դավիթ Հարությունյանին զրկել է «ԲՄՎ»-ից, իսկ Honda CR-V-ն էլ տվել է նրա տեղակալին: Կառավարության մեր աղբյուրն ասում է, որ աշխատակազմի ղեկավար-նախարարին տրված նոր մեքենան անհամեմատ զիջում է նախկիններին։ Սա ոգեւորություն է առաջացրել Դավիթ Հարությունյանին չսիրողների շրջանում»:

Առավել մանրամասն՝ թերթի այսօրվա համարում: