«Սասնա ծռերի» գործով նիստը դարձյալ ընդմիջվեց` դատավորը սանկցիաներ կիրառեց. լուսանկարներ

Ավան և Նոր Նորք վարչական շրջանների ընդհանուր իրավասության դատարանում մեկժամյա ընդմիջումից հետո վերսկսվեց «Սասնա ծռեր» խմբի անդամներից 14-ի գործով արտագնա դատական նիստը:

Նիստերի դահլիճում՝ ապակիներից այն կողմ գտնվող քաղաքացիները դժգոհում են, որ դատավարության մասնակիցների ձայնը չի լսվում, միայն լսելի է դատավոր Արտուշ Գաբրիելյանի ձայնը:

Նախագահող դատավոր Արտուշ Գաբրիելյանը, քննարկելով գործով ամբաստանյալ Գագիկ Եղիազարյանի պաշտպան Տիգրան Եգորյանի նկատմամբ դատական սանկցիա կիրառելու հարցը, որոշեց սանկցիա կիրառել պաշտպանի նկատմամբ և նրան պատասխանատվության ենթարկելու համար դիմել Փաստաբանական պալատ:

Դատավորը նիստի ընթացքում խոսելու համար սանկցիա կիրառեց նաև գործով ամբաստանյալ Վարուժան Ավետիսյանի նկատմամբ:

Գործով մեկ այլ ամբաստանյալի պաշտպան Ինեսսա Պետրոսյանը նշեց, որ դատական նիստն ընթանում է խախտումներով, պաշտպանների մի մասը, ծանուցված չլինելով, չի ներկայացել դատարան: Նշենք, որ այս գործով պատշաճ չի ծանուցվել և դատական նիստին չի ներկայայացել փաստաբան Հայկ Ալումյանը, ով ներկայացնում է ՊՊԾ գնդի գրավման և պատանդ պահելու, ինչպես նաև ոստիկաններ Արթուր Վանոյանի և Յուրի Տեփանոսյանի սպանության մեջ մեղադրվող Սմբատ Բարսեղյանի շահերը:

Ի պատասխան փաստաբան Ինեսսա Պետրոսյանի բարձրացրած խնդրին՝ դատավոր Արտուշ Գաբրիելյանն ասաց, որ գործը դեռևս նախապատրաստական փուլում է, և քանի որ դեռևս չեն հասել ամբաստանյալներին և նրանց պաշտպաններին ներկայացնելու փուլին, ուստի չի կարելի ասել, թե ամբաստանյալների իրավունքները ոտնահարվում են:

Այս պահին դատական նիստը դարձյալ մեկ ժամով ընդմիջվել է: