Ո՞վ պետք է ռաբիսն արգելի, և ինչո՞ւ Հ1-ով չպետք է ռաբիս հնչի, եթե իրենք էլ ռաբիս են. Նիկոլայ Ծատուրյան

Ո՞վ պետք է ռաբիսն արգելի, և ինչո՞ւ  Հ1-ով չպետք է ռաբիս հնչի, եթե իրենք էլ ռաբիս են. այսօր, խոսելով Հ1-ով եթեր հեռարձակվող «Ամենակարող երգիչը» հաղորդման մասին, լրագրողներին ասաց ՀՀ ժողովրդական արտիստ Նիկոլայ Ծատուրյանը:

Ըստ նրա` սա ճաշակի, մտքի, ինտելեկտի բացակայության հետևանք է, և այնպես են անում, որ հասարակությունը կամաց-կամաց սովորի ռաբիսին:

«Պետությունը ոչ մի ծրագիր չունի, դալի-դոլի, ոնց ուզում` գնում է մշակութային կյանքը` «առաջ»: Ունենք Մանսուրյան, Բաբաջանյան, բայց, չէ, եթերից պետք է Հայկո հնչի: Եթե հասարակությունը փախչում է Հայաստանից աշխատանքի պատճառով, մտավորականությունն էլ սրա հետևանքով կգնա: Կառավարության նպատակը զոմբիացած մարդիկ ունենալն է», կարծիք հայտնեց Ծատուրյանը:

Պարզաբանումը, թե ժողովուրդն ինչ ուզում է, իրենք էլ դա են մատուցում, նրա կարծիքով, ծիծաղելի է: «Դուք անընդհատ էդ «բառախլո»-ն եք մատուցում, մարդիկ էլ սովորում են դրան: Փրկությունը մեկն է` պետք է, մանկապարտեզից, դպրոցից սկսած, երեխաներին ճիշտ երաժշտություն, գրականություն մատուցել»,- ասաց Ծատուրյանը: