Նախագահի հրաժեշտի ելույթը

ՀՀ Գերագույն խորհրդի պատգամավոր Վիգեն Խաչատրյանն այսօր լրագրողների հետ հանդիպման ընթացքում, խոսելով նորանշանակ վարչապետ Կարեն Կարապետյանից ակնկալվող գործողությունների մասին, հույս հայտնեց, որ նրա՝ «անցյալի բեռ» չունենալը կօգնի ավելի ճիշտ ղեկավարել կառավարությունը: Նա նաև նշեց, որ իր համար ամբողջությամբ պարզ չդարձավ, թե ինչո՞ւ հրաժարական տվեց Հովիկ Աբրահամյանը:

«Բավարար տեղեկատվություն, թե ինչո՞ւ վարչապետը հրաժարական տվեց, մենք այդպես էլ չստացանք: Ներկայացված տեղեկատվությամբ անհասկանալի էր պատճառը: Ես, այդուհանդերձ, կարծում եմ, որ ճիշտ է արել»,- ասաց Խաչատրյանը՝ հավելելով՝ այն մարտահրավերները, որոնք կանգնած են պետության առջև, պատշաճ արձագանքի չեն արժանանում:

«Ես կարծում եմ՝ չկա այն ուժը, որին հասարակությունը կարող է հավատալ, որը, գալով իշխանության, կբարելավի երկրի վիճակը: Եվ մեզ պետք էր մի մարդ, որը ծանրաբեռված չէ անցյալի բեռով, և կարծում եմ, որ լավ ընտրություն է տեղի ունեցել, որը հույս է ներշնչում, որ կարող են լինել բարեփոխումներ»,- ասաց նա:

Ըստ Խաչատրյանի` ինքը տարակուսանքով է վերաբերվում Սերժ Սարգսյանի այն ասածին, թե Կարեն Կարապետյանը բարեփոխումների մեծ ալիքի սիմվոլ է: «Սա ավելի շատ նման էր նախագահի հրաժեշտի ելույթի, ոչ թե վարչապետին ներկայացնելու խոսքի: Այդ սիմվոլը պետք է լինի նախագահը»,- ասաց նա:

Նա նաև ասաց, որ պետք է հետևել ու հասկանալ՝ Կարապետյանը որպես քավության նոխա՞զ է բերվել, թե՞ ոչ: