Տնտեսական աճի հիմնական «մեղավորները»

Այսօր ԱԺ ֆինանսավարկային հարցերի մշտական հանձնաժողովում ՀՀ գլխավոր գանձապետ Ատոմ Ջանջուղազյանը ներկայացրեց 2015թ.երկրորդ  եռամսյակի բյուջեի կատարողականը: Նրա խոսքով՝ առաջին կիսամյակում տնտեսական աճը կազմել է 2,8 տոկոս:

Տնտեսական աճը գրանցվել է հիմնականում ծառայությունների մատուցման ոլորտում և արդյունաբերության՝ հանքարդյունաբերության և մշակվող արդյունաբերության/ոսկերչություն/ ոլորտում: Մասնավորապես՝ ծառայությունների մատուցման ոլորտում աճ է գրանցել ՀԷՑ-ը, ու թեև էլեկտրաէներգիայի արտադրությունը նվազել է, սակայն էլեկտրաէներգիայի բաշխման ծառայությունների ցուցանիշները աճել են:

Մասնավոր ծառայությունների ոլորտում աճ է գրանցվել` հիմնականում Toto, Vivaro-ների, կազինոների, շահումով խաղերի, վիճակախաղերի հետ կապված:

Գյուղատնտեսությունը երկրորդ եռամսյակում ունեցել է համեստ տնտեսական աճ, բացասական ցուցանիշներ են գրանցել շինարարությունն ու առևտուրը:

Մասնավոր սպառումն աճել է 1 տոկոսով, կապիտալ ներդրումները նվազել են 3 տոկոսով: Ապրանքների և ծառայությունների արտահանումը աճել է 24 տոկոսով, արտաքին առևտրաշրջանառությունը ավելացել է 3,7 տոկոսով, ներմուծման ծավալները նվազել են, մասնավոր տրանսֆերտները շարունակում են նվազել՝ 16 տոկոսով:

Արտաքին պարտքը կազմում է 5 միլիարդ 343 միլիոն դոլար: