Ըստ վարչապետի` 40 մլն դրամը շատ է տանիքի վերանորոգման համար

Այսօր կառավարության նիստում ԿԳ նախարար Լևոն Մկրտչյանը ներկայացրեց որոշում, որը մշակվել է վարչապետի հանձնարարականի հիման վրա: Խոսքը ուժեղ քամու հետևանքով դպրոցներից մեկի վնասման մասին է: Նախատեսվում է բյուջեի միջոցներից 40 միլիոն դրամ հատկացնել Երևանի Ս. Հովսեփյանի անվան N 115 ավագ դպրոցի տանիքի և հարակից տան տանիքի վերանորոգման համար: Նախարարը նշեց, որ մասնագետները եղել են համապատասխան վայրում, գնահատել վնասի չափը:

«Բայց տանիքի վերանորոգման համար 40 միլիոն դրամը շատ չէ՞»,- հարցրեց վարչապետ Հովիկ Աբրահամյանը:

Լևոն Մկրտչյանը նշեց, որ ուժեղ քամին ամբողջությամբ ետ է շպրտել տանիքը, իսկ մասնագետները վնասի չափը այդքան են գնահատել:

Վարչապետը հանձնարարեց ևս մեկ անգամ քննարկել խնդիրը և ներկայացնել որոշման նախագիծը: