ՍԴ-ն կքննարկի Վարուժան Ավետիսյանի ու Պավլիկ Մանուկյանի դիմումը

Սեպտեմբերի 2-ին ՀՀ Սահմանադրական դատարանը գրավոր ընթացակարգով քննության կառնի «Սասնա ծռեր» խմբի անդամներ` հուլիսից կալանքի տակ գտնվող Պավել Մանուկյանի և Վարուժան Ավետիսյանի միասնական դիմումը: Այս մասին տեղեկանում ենք ՍԴ կայքից: Խմբի երկու անդամները դեռևս այս տարվա մարտին էին դիմել ՍԴ՝ վիճարկելու ՀՀ քրեական դատավարության օրենսգրքի 283-րդ հոդվածի 1-ին մասի, 288-րդ հոդվածի 3-րդ մասի՝ ՀՀ Սահմանադրությանը համապատասխանության հարցը:

Ըստ դիմումատուների՝ օրենսգրքի 283-րդ հոդվածի 1-ին մասով նախատեսված պահանջը՝ կապված անձի կալանավորմանն առնչվող դատական լսումները դռնփակ դատական նիստում անցկացնելու հետ, չի բխում Սահմանադրության 63-րդ հոդվածի 1-ին և 2-րդ մասերից և ուղղակիորեն հակասում է վերջիններիս:

Պավլիկ Մանուկյանն ու Վարուժան Ավետիսյանը կարծում են, որ քրեական դատավարության 288-րդ հոդվածի 3-րդ մասի` «Դատական ստուգումը կատարվում է դռնփակ դատական նիստում` դատախազի և պաշտպանի մասնակցությամբ» իրավադրույթը հակասում է Սահմանադրության 63-րդ հոդվածի 1-ին և 2-րդ մասերին:

Սահմանադրական դատարանը Պավել Մանուկյանի և Վարուժան Ավետիսյանի դիմումները պետք է քննության առներ դեռևս հուլիսի 26-ին, սակայն, դատական կազմի որոշմամբ, նիստը հետաձգվել է մինչև սեպտեմբերի 2-ը: