Թուրքիայի զբոսաշրջության ոլորտում 1994-ից ցայսօր գրանցվել է ամենացածր ցուցանիշը

Թուրքիայի տնտեսության առաջատար ճյուղերից մեկը համարվող զբոսաշրջության ոլորտը շարունակում է հետընթաց արձանագրել: Թուրքիայի մշակույթի և զբոսաշրջության նախարարությունը հրապարակել է նախորդ ամիս Թուրքիա այցելած զբոսաշրջիկների թիվը: 2015 հունիսի ցուցանիշների հետ համեմատած 2016 հունիսին Թուրքիա մուտք գործած զբոսաշրջիկների թիվը նվազել է 40.86 տոկոսով՝ 4 մլն. 123 հազարից նվազելով մինչև 2 մլն. 438 հազար. տեղեկացնում է Ermenihaber-ը:

Ըստ թուրքական «memurlar»  լրատվական կայքի` սա 1994 թվականից մինչև այժմ արձանագրված  ամենացածրն է ցուցանիշն է: Իսկ 2016թ. առաջին կիսամյակում նախորդ տարվա նույն ժամանակահատվածի համեմատ գրանցվել է 27.89 տոկոս անկում: 2015-ի հունվար-հունիս ամիսների Թուրքիայում իր հանգիստն անցկացրել էր 14 մլն 894 հազար 754 մարդ, իսկ 2016-ի  նույն ժամանակահատվածում՝ 10 մլն 740 հազար մարդ:

Ցուցանիշների անկման պատճառներից են թուրք-ռուսական ճգնաժամը, Թուրքիայում տեղի ունեցող ահաբեկչությունները, «Իսլամական պետության» սպառնալիքները, «Քուրդիստանի բանվորական կուսակցության» գործունեությունը և այլ բացասական ընկալումներ, որ ձևավորվել են Թուրքիայի մասին: Տուրիզմի ոլորտի ներկայացուցիչները մեծ հույսեր են կապում օգոստոսի 9-ին կայանալիք Թուրքիայի նախագահ Ռեջեփ Թայիփ Էրդողանի և Ռուսաստանի նախագահ Վլադիմիր Պուտինի հանդիպման հետ՝ ակնկալելով դրական տեղաշարժ: