«Ճգնաժամին վերջ տալու գործընթացն ակտիվորեն սկսվեց». Էրդողանը կզանգահարի Պուտինին

Թուրքիայի վարչապետ Բինալի Յըլդըրըմը երկրի պետական TRT հեռուստաալիքի ուղիղ եթերում հայտարարել է, որ նախագահ Էրդողանը շուտով կզանգահարի ՌԴ նախագահ Վլադիմիր Պուտինին:

Ըստ Demokrathaber-ի՝ Թուրքիայի վարչապետը տեղեկացրել է, որ հեռախոսազրույցը տեղի կունենա կա'մ չորեքշաբթի, կա'մ հինգշաբթի:

«Ասում ենք՝ երանի կատարվածը տեղի չունենար: Մենք մեր ափսոսանքը հայտնեցինք: Ճգնաժամին վերջ տալու գործընթացն ակտիվորեն սկսվեց: Դրան հետևելու են տնտեսական ոլորտում հարաբերությունները: Համարելու ենք, որ 6 ամսվա ընթացքում կատարվածները չեն եղել ու շարունակելու ենք մեր ճանապարհը: Մենք հայտնեցինք, որ հարաբերությունների կրկին բարելավման համար հարկ եղած դեպքում  կփոխհատուցենք»,- ասել է Յըլդըրըմը:

Հիշեցնենք, որ նախօրեին Թուրքիայի նախագահը ուղերձ էր հղել Պուտինին, որում մասնավորապես ասվում էր. «Ասում եմ` ներեցեք: Ամբողջ սրտով կիսում եմ ձեր ցավը: Ռուսաստանցի օդաչուի  ընտանիքը մենք դիտարկում ենք որպես թուրքական ընտանիք: Հանուն ցավի ու վնասի ծանրության թեթևացման` մենք պատրաստ ենք ցանկացած նախաձեռնության»: