Զինծառայողների սոցիալական ապահովության խնդիրները ուսումնասիրելու համար աշխատանքային խումբ կստեղծվի

Այսօր ԱԺ պաշտպանության և ազգային անվտանգության հարցերի հանձնաժողովում ընդունվեց «Ժառանգություն» խմբակցության պատգամավոր Թևան Պողոսյանի առաջարկությունը՝ ստեղծել աշխատանքային խումբ, որը պետք է ուսումնասիրի պաշտպանության ոլորտի սոցիալական բաղադրիչը: Պատգամավորի խոսքով՝ ապրիլյան պատերազմը ստիպում է այդ հարցին ուշադրություն դարձնել:

«Առաջարկում եմ աշխատանքային խումբ ձևավորել պաշտպանության ոլորտի սոցիալական խնդիրները ուսումնասիրելու, համակարգի պրոբլեմներն ու առաջարկները վեր հանելու համար»,- ասաց Թևան Պողոսյանը՝ հավելելով, որ աշխատանքային խմբում կարող են ընդգրկվել պատգամավորներ ու փարձագետներ` ըստ ցանկության, ինչպես նաև կառավարության ներկայացուցիչներ:

Հանձնաժողովի նախագահ Կորյուն Նահապետյանը նշեց, որ ապրիլյան պատերազմը ցույց տվեց, որ պետք է վերագնահատել պաշտպանության ոլորտի սոցիալական կարիքները, զինծառայողների սոցիալական ապահովության խնդիրները:

«ՊՆ-ն մշակում է զինծառայողների սոցիալական ապահովության ռազմավարություն, որն առաջիկայում, հավանաբար, կներկայացվի ԱԺ»,- ասաց նա: