10 օրվա ընթացքում տարկետման իրավունքը վերացնելու հարցը կմտնի ԱԺ

Այսօր ԱԺ պաշտպանության, ազգային անվտանգության հարցերի մշտական հանձնաժողովում քննարկվում էր ԱԺ «Ժառանգություն» խմբակցության պատգամավորներ Թևան Պողոսյանի ու Ռուբեն Հակոբյանի կողմից ներկայացված օրենսդրական նախաձեռնությունը «Զինապարտության մասին» և «Բարձրագույն ու հետբուհական մասնագիտական կրթության մասին» օրենքներում փոփոխություններ անելու մասին, որով առաջարկվում է հանել ուսումը շարունակելու համարպարտադիր զինվորական ծառայության զորակոչից տարկետում ստանալու իրավունքը:

Ռուբեն Հակոբյանը նշեց, որ առաջին անգամ նույն բովանդակությամբ օրինագիծ շրջանառության մեջ է դրվել Ազգային Ժողովում դեռ քսան տարի առաջ, այն ժամանակ պաշտպանության նախարարն էր Վազգեն Սարգսյանը: Պատգամավորի խոսքով, այն ժամանակ էլ եղան ակտիվ քննարկումներ, շատերը դրական էին տրամադրված, սակայն վերջին պահին ԱԺ նախագահը՝ Բաբկեն Արարքցյանը, ով դեմ էր այս օրենքին, դրեց իր վստահության հարցը` սպառնալով, որ հրաժարական կտա: Առաջացավ քաղաքական ճգնաժամ, հարցը քվեարկության չգնաց, ու արդյունքում` Վազգեն Սարգսյանը հետ վերցրեց այդ օրինագիծը: Դրանից հետո տարբեր ձևաչափերով այդ օրինագծին անդրադարձ եղել է:

«Ես և Թևան Պողոսյանը մեկ տարի առաջ ներկայացրեցինք այս նախագիծը, և ես վերջերս դիմեցի կառավարությանը, թե ո՞րն է նրա դիրքորոշումը: Եվ կառավարության աշխատակազմի ղեկավար-նախարար Դավիթ Հարությունյանը նշեց, որ ամբողջական փաթեթ է մշակում զինապարտության մասին, և մեր առաջարկությունները տեղ կգտնեն այդ փաթեթում»,- ասաց Ռուբեն Հակոբյանը:

Նրա խոսքով՝ հարցը լայն հնչեղություն ունի, և իրենք պատրաստ են սպասել կառավարության փաթեթի ներկայացմանը:

«Ոչ թե մեր ընտրությունը, այլ մեր ճակատագիրն է դառնալ բանակ-պետություն: Այսօր էլ աշխարհում կան բանակ-պետություններ, որոնք շրջապատված են հակառակորդներով, այնտեղ անգամ կանայք են ծառայում: Շվեյցարիայի ութ միլիոն բնակիչներից մեկուկես միլիոնը կանոնավոր բանակն է կազմում: Այնպես որ` պետք է ելնել պետության յուրահատկությունից: Պետք է կոչ անեմ այս պահին զերծ մնալ քննարկումներից: Խոսել եմ ԿԳ նախարարի հետ, ՊՆ ներկայացուցիչների հետ, Դավիթ Հարությունյանի հետ: Առավելագույնը տասը օրվա ընթացքում հարցը կմտնի խորհրդարան, որպեսզի կրկնություն չլինի: Որոշեցինք առայժմ հանել քննարկումից: Երբ տասը օրվա ընթացքում մտնի խորհրդարան, լիարժեք կքննարկենք հարցը»,- ասաց պատգամավորը: