Տարկետման որոշումը վերացնելու համար անհրաժեշտ կլինի քաղաքական միասնություն. Արմեն Աշոտյան

Այսօր կառավարության հետ հարցուպատասխանի ժամանակ ԱԺ «Ժառանգություն» խմբակցության ղեկավար Ռուբեն Հակոբյանը հարց ուղղեց ԿԳ նախարար Արմեն Աշոտյանին կրթության ոլորտում տարկետումի վերաբերյալ, որը պարունակում է կոռուպցիոն ռիսկեր, և դրանից տուժում է կրթության ոլորտը:

«Գիտեմ, որ քայլ առ քայլ կառավարությունը նվազեցնում է տարկետումների թիվը: Առաջարկում ենք ամբողջովին վերացնել տարկետումի որոշումը»,- ասաց Ռուբեն Հակոբյանը:

Արմեն Աշոտյանը նշեց, որ զինապարտությունը չի հակադրվում կրթության ոլորտին: Ըստ նրա` կառավարությունը ողջունում է պատգամավորի նախաձեռնությունը, սակայն դրա իրականացման համար պետք կլինի քաղաքական միասնություն:

«Քաղաքական ոլորտում, ցավոք, լինում են գայթակղություններ՝ զբաղվել ամբոխահաճությամբ՝ ձեռք բերելով միավորներ, բայց ընդունում եմ, որ տարկետումը կտրուկ սրացնում է կոռուպցիոն ռիսկերը և դրանից տուժում է կրթության ոլորտը: Կարծում ենք, որ քաղաքական համերաշխության դեպքում կառավարությունը կներկայացնի զուգահեռ մի փաթեթ, երբ բանակից զորացրված երիտասարդները արտոնություններ ունենան կրթության ոլորտում»,- ասաց նախարարը: