Առողջապահության նախարարը ներկայացրեց վիրավոր զինծառայողների վիճակը

ՀՀ առողջապահության նախարար Արմեն Մուրադյանն այսօր խորհրդարանում լրագրողների հետ զրույցում հայտարարեց, որ ապրիլի սկզբից տեղի ունեցող ռազմական գործողությունների հետևանքով վիրավորում ստացածները գտնվում են տարբեր բժշկական հաստատություններում: Ըստ նրա` ամենօրյա տեղեկություններ է ստանում ծայրահեղ ծանր և ծանր վիճակում գտնվողների մասին:

«Թերևս ունենք ծայրահեղ վիճակում գտնվող վիրավորներ, բայց մնացածի վիճակը կայունանում է, և հուսով եմ, որ ավելի կլավանա: Բազմաթիվ դուրս գրման դեպքեր են եղել»,- ասաց նախարարը, ապա հավելեց, որ երեկ և այսօր վիրավորվածներից մեկին Երևան են տեղափոխել` կրծքավանդակի շրջանի վիրավորումով: Այլ վիրավորների մասին նախարարը չխոսեց, միայն նշեց, որ այդ մասին ՊՆ-ն ավելի ճշգրիտ ինֆորմացիա կհաղորդի:

Նախարարը տեղեկացրեց նաև, որ հիվանդանոցում գտնվող վիրավորներից երկուսի վիճակը ծայրահեղ ծանր է: «Մենք ամենօրյա պայքարի խնդիր ունենք, կայունացման խնդիր: Մնացած ծանրների հետ կապված էլ մենք տեղեկատվություն ունենք, բայց հույս ներշնչող իրավիճակ է, և կարծում եմ, որ հետագայում խնդիրները կլինեն նվազագույնը: Վիրավորվածներ ունենք, որ հետագա բուժման կարիք կունենան` պրոթեզավորման և այլ հարցերի հետ կապված»,- ասաց նա: