Արդարադատության նախարարը ներկայացրեց նոր համամասնական ընտրակարգի նրբությունները

Քննարկումը նպատակ ունի վեր հանել ԸՕ բոլոր անհասկանալի դրույթները. «Արմենիա Մարիոթ» հյուրանոցում ԸՕ նախագծի հանրային քննարկման ժամանակ ասաց արդարադատության նախարար Արփինե Հովհաննիսյանը: Նրա խոսքով` Ընտրական օրենսգրքով պետք է փորձ արվի լուծել այն հիմնական խնդիրները, որոնք դրված են Սահմանադրության մեջ:

«Մասնավորապես` համամասնական ընտրակարգ ապահովելը, կայուն մեծամասնություն ապահովելը և մի շարք այլ խնդիրներ, որոնք դրված են Սահմանադրության հիմքում: Այս տեսանկյունից` Ընտրական օրնեսգրքում փորձ է արվել լուծում տալ այն հարցերին, որոնք ժամանակի ընթացքում այս կամ այն անգամ բարձրաձայնվել են և խնդրահարույց են համարվել»,- ասաց նա` հավելելով, որ ցանկանում է առաջին հերթին անդրադառնալ համամասնական ընտրակարգի ապահովմանը:

«Սահմանադրությունը նախատեսում է, որ ԱԺ-ի ընտրություններն անցկացվում են համամասնական ընտրական համակարգով, և այս ընթացքում համամասնականի տարատեսակ մոդելների ուսումնասիրությունը ցույց է տալիս, որ աշխարհում կան համամասնական ընտրակարգով տարբեր երկրներ, և դրանք ունեն բազմաթիվ առավելություններ ու թերություններ: Գործող ընտրական համակարգի հիմնական թերություններից մեկը համամասնական ընտրակարգի դեպքում համարվում է ընտրողի և ընտրատարածքի միջև կապի բացակայությունը, իսկ մեծամասնական ընտրական համակարգի պարագայում գործ ունենք անհատի գործոնի ընդգծման կամ շեշտման հետ»,- նշեց նախարարը:

Նրա բնորոշմամբ` այն մոդելը, որն առաջարկվել է, ներկայացնում է կուսակցության և անհատի սկզբունքների համադրման հաջողված մոդել: «Մենք առաջարկում ենք, որ ՀՀ տարածքը բաժանվի 13 ընտրատարածքների, ինը` մարզերում, չորսը` Երևանում: Սրանով կերաշխավորվեն համամասնական ընտրական համակարգի առավելությունները, և ընտրողը հնարավորություն կունենա հասկանալու, թե ով է իր պատգամավորը և որ տարածքից է նա»,- ասաց Արփինե Հովհաննիսյանը:

Նա նշեց նաև. «Մենք նախատեսում ենք, որ յուրաքանչյուր կուսակցություն կամ կուսակցությունների դաշինք պիտի ներկայացնի համապետական ցուցակ և տարածքային ցուցակներ: Համապետական ցուցակն էլ բաղկացած է երկու մասից: Առաջին մասում ընդգրկված են այն թեկնածուները (նվազագույնը` 80, առավելագույնը` 100), որոնցից կազմվում են տարածքային ցուցակները: Տարածքային ցուցակներում ընդգրկված յուրաքանչյուր թեկնածու առկա է նաև համապետական ընդհանուր ցուցակում: Համապետական ցուցակում կարող են լինել նաև թեկնածուներ, որոնք տարածքային ցուցակներում ընդգրծկված չեն: Մանդատների բաշխումը կատարվում է` հաշվի առնելով 101 պատգամավորների թիվը և գումարած համապետական ցուցակի երկրորդ մասով երաշխավորված և Սահմանադրությամբ երաշխավորված չորս ազգային փոքրամասնությունների տեղերը: Այսինքն` 105 մանդատի սկզբունքով»:

Նախարարն ընդգծեց նաև, որ Ընտրական օրենսգրքով նախատեսված է, որ հիսուն-հիսուն սկզբունքով են բաշխվելու համապետական և տարածքային ցուցակները: «ԱԺ ընտրվելու և մանդատների բաշխման մասին կարող ենք խոսել այն դեպքում, երբ որևէ կուսակցություն ստացել է 53 մանդատ կամ ընդհանուր 51 տոկոսը: Մենք նախատեսում ենք նաև, որ հնարավոր է ձևավորվեն կոալիցիաներ, բայց ավելի կարևոր է այն, որ Սահմանադրությունը նախատեսում է կայուն խորհրդարանական մեծամասնության համակարգը»,- ասաց նա: