Հայ-ռուսական հարաբերությունները վտանգավոր փուլում են. Քոքոբելյան

Մեր ռուս գործընկերը խորը մտածելու և հետևություններ անելու առիթ ունի. այսօր լրագրողների հետ զրույցում ասաց ԱԺ պատգամավոր, «Ազատ դեմոկրատներ» կուսակցության ղեկավար Խաչատուր Քոքոբելյանը  ԱԺ պաշտպանության, ազգային անվտանգության և ներքին գործերի մշտական հանձնաժողովի և ՌԴ Դաշնային ժողովի Դաշնության խորհրդի պաշտպանության և անվտանգության կոմիտեի համատեղ նիստի ընդմիջմանը:

Նշենք նաև, որ նիստի մեկնարկին հնչեցրած ելույթում ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը բավական կոշտ վերաբերմունքի է արժանացրել ռուսական կողմին:

Քոքոբելյանը հույս հայտնեց, որ առաջիկայում այդ հարցապնդումները կշարունակվեն, և Ռոգոզինի ու ռուսական կողմի հայտարությունները համապատասխան բացատրության կարժանանան: Պատգամավորի խոսքով` մեր ռուս գործընկերը պետք է հասկանա և ընդունի, որ, հայ-ռուսական բարեկամության պայմանագրից սկսած,  այդ հարաբերությունների անհրաժեշտությունն ու պետքը միայն հայկական կողմը չէ, որ ունի:

«Ռուսատանը պետք է շահագրգիռ լինի և ամեն կերպ ուղղակիորեն դողա հայ-ռուսական հարաբերությունների  համար և  կարծես թե իրենք մինչև այս պահը ապավինում էին նրան, որ  հայ-թուրքական հարաբերությունների դարավոր` ոչ բարեկամական մթնոլորտի առկայությունը կարող է հիմք հանդիսանալ, որ առանց ավելորդ ջանասիրության հայ-ռուսական հարաբերությունները պահպանվեն: Այևս խորհրդային միություն չկա ու լավ կլինի, որ խորհրդային միության  մտածելակերպը օր առաջ մոռացվի»,- ընդգծեց Քոքոբելյանը և հավելեց. «Հայ-ռուսական հարաբերությունները վտանգավոր փուլում են: Այս քառօրյա ծանր պատերազմը  ցույց տվեց, որ մեր հարաբերություններն այն մակարդակի վրա չեն, ինչ մակարդակ որ ակնկալվում էր: Կան չոր փաստեր, որոնք հայ-ռուսական բարեկամության օգտին չեն խոսում»: