Գազի հարցերով ժամանակավոր հանձնաժողովը ծածկադմփոց արեց. Խաչատուր Քոքոբելյան

Այսօր ԱԺ նիստում, երբ քննարկվում էր գազի հարցերով ժամանակավոր հանձնաժողովի եզրակացությունը, ԱԺ պատգամավոր Խաչատուր Քոքոբելյանը խիստ քննադատության ենթարկեց այդ հանձնաժողովի գործունեությունը` ասելով, որ այն իզուր է ձևավորվել:

Պատգամավորի խոսքով՝ այդ հանձնաժողովը պետք է լուծեր 20 տոկոս բաժնեմասերի օտարման օրինական լինելու խնդիրը, գնագոյացման խնդիրը, երբ 189 դոլարով սահմանին ստացված գինը կրկնակի թանկանում է, երբ հասնում է սպառողներին: «Դա շատ զավեշտալի է, և հանձնաժողովի ընդդիմադիր անդամներ պետք է ասեին, որ այդտեղ կա «ատկատի» խնդիր»,- ասաց պատգամավորը:

Նա խոսեց նաև գազի կալորիականության մասին, հաշվիչների կասկածելի ցուցմունքների մասին: Եզրակացության մեջ չկա հիմնավորում, թե ինչու է «Գազպրոմ»-ը այդպիսի ծախսեր անում, ինչու է այդքան բարձր աշխատավարձեր տալիս իր աշխատողներին, ու դա ներկայացնում որպես ծախսագրում:

«Ես այստեղից հայտարարում եմ, որ այն հաշվիչները, որոնք օգտագործում են մեր քաղաքացիները, բացարձակապես ճշգրիտ չեն: Այս պարագայում պարզագույն խնդիրները չլուծեց այս հանձնաժողովը: Այս հանձնաժողովը ծածկադմփոց արեց, ուրիշ ոչ մի խնդիր չլուծեց»,- ասաց պատգամավորը: