Միջազգային հանրությունն այլեւս չի կարողանում դերակատարություն ունենալ. Արտակ Զաքարյան

Դիվանանագիտական աշխատանքները տարվում են, այժմ էլ նաև աշխատանքներ են տարվում այլ երկրների խորհրդարանների հետ` սահմանին տիրող իրական իրավիճակը ներկայացնելու համար, որովհետև ադրբեջանական կողմը ստահոդ լուրեր է տարածում. այսօր խորհրդարանում ասաց ԱԺ արտաքին հարաբերությունների հանձնաժողովի նախագահ, ՀՀԿ-ական Արտակ Զաքարյանը:

«Մենք մեր խորհրդարանական գործընկերների հետ աշխատում ենք, ներկայացնում իրավիճակը և փորձում յուրաքանչյուրից ստանալ աջակցություն` Ադրբեջանի գործողությունները դատապարտող: Այդ առումով, բնականաբար, աշխատանքը պետք է շարունակվի նաև հետագայում, եթե սահմանին այսպիսի իրավիճակ ունենանք: Կարծում եմ, որ սա Ադրբեջանի համար մեծ դաս է, որ, ի վերջո, պետք է հրաժարվել ռազմական լուծումներ փնտրելուց: ԼՂՀ բանակն ապացուցեց, որ ռազմական լուծման ճանապարհը Ադրբեջանը չունի, բայց, միաժամանակ, մենք ինքներս պետք է դասեր քաղենք, որ միջազգային հանրությունը և կազմակերպությունները պարիտետային և հավասարակշռող հայտարարություններով այլևս չեն կարող դրական դերակատարություն ունենալ»,- ասաց պատգամավորը և հավելեց, որ յուրաքանչյուր դեպք պետք է ստանա արժանի գնահատական:

«Տվյալ պարագայում Ադրբեջանը տարածաշրջանում լարվածության ձևավորման միակ պատասխանատուն է»,- հավելեց նա:

Yerkir.am-ի հարցին`եթե միջազգային հանրությունը շարունակի նույն ոճով` հավասարության նշան դնող քաղաքականությամբ առաջնորդվել, մեր գործողություններն ինչպիսի՞ն պետք է լինեն, Զաքարյանը պատասխանեց. «Մենք պետք է ամեն ինչ անենք, որ ամբողջ միջազգային հանրությունն, ի վերջո, կարողանա բաց աչքերով նայել իրականությանը»: