Թող պետական շենքերը վերանորոգեն ու զբաղեցնեն, ոչ թե վարձով տարածք զբաղեցնեն. վարչապետը դժգոհեց

Այսօր կառավարության նիստում կառավարությանն առնթեր պետական գույքի կառավարման վարչության պետ Արման Սահակյանը ներկայացրեց որոշում, որով առաջարկվում է «Էրեբունի պլազա» ՍՊԸ-ից վարձակալած տարածքի փոփոխություն, քանի որ կառավարական համար 2 նոր մասնաշենք տեղափոխվելու նպատակով ՀՀ Սփյուռքի նախարարությունը ժամկետից շուտ է ազատել այդ տարածքը:

Հովիկ Աբրահամյանը հարցրեց, թե տարեկան որքա՞ն վարձ էին վճարում: Արման Սահակյանը պատասխանեց` 83 միլիոն դրամ:

«Ես երեկ մի քանի շենքերում եմ եղել, որոնք պատկանում են տարբեր գերատեսչությունների: Մենք ունենք բազմաթիվ շենք-շինություններ, որոնք բարձիթողի վիճակում են գտնվում, բայց չենք օգտագործում դրանք: Բազմաթիվ գերատեսչություններ, ՊՈԱԿ-ներ ունենք, որոնք վարձով են շենք զբաղեցնում: Հարկավոր է, որ նախարարությունները, գերատեսչություններն այդ հարցին անդրադառնան: Այնպես են բռնել այդ գույքը, որ չեմ հասկանում, թե ինչ են անելու, ոչ էլ տարիներով այդ շենք-շինությունները տեսնում են: Դրանք քայքայված վիճակում են գտնվում, ջարդված, կոտրված: Բայց այդ շենքերը մեր սեփականությունն են, պետական սեփականություն են, վերանորոգենք, թող գերատեսչությունները զբաղեցնեն այդ տարածքները, ոչ թե գնան, վարձով այլ տարածք զբաղեցնեն: Ես հանձնարարական եմ տվել, որ գլոբալ առումով այդ հարցին լուծում տանք»,- ասաց Հովիկ Աբրահամյանը: