Նախատեսվում է «Որոտան Սիսթեմս»-ին հարկային արտոնություն տրամադրել

Կառավարության վաղվա նիստի օրակարգում ընդգրկված է որոշում՝ ներդրումային ծրագրի շրջանակներում «Որոտան Սիսթեմս» ՍՊԸ-ի կողմից ապրանքների ներմուծման դեպքում մաքսային և հարկային մարմինների կողմից հաշվարկված ԱԱՀ  գումարների վճարման ժամկետը երեք տարի ժամկետով հետաձգել:

Կառավարության սահմանած կարգով ընտրված «Որոտան Սիսթեմս» սահմանափակ պատասխանատվությամբ ընկերության կողմից իրականացվող ներդրումային ծրագրի շրջանակներում 2016 թվականի ապրիլի 1-ից մինչև 2016 թվականի դեկտեմբերի 31-ը ներառյալ ներմուծվող ապրանքների` համաձայն հավելվածի, մաքսային և հարկային մարմինների կողմից հաշվարկվող ավելացված արժեքի հարկի վճարման ժամկետը գործում է ներմուծման հայտարարագրման օրվանից հաշված 3 տարի ժամկետով:

Ներդրումային ծրագրի շրջանակներում «Որոտան Սիսթեմս» ՍՊ ընկերության նպատակն է ՀՀ Սյունիքի մարզի Խնձորեսկ գյուղում կառուցել փոքր հիդրոէներգակասկադ` օգտագործելով նշված տարածքի գետերի պոտենցիալը: Վերոնշյալ գործունեության կազմակերպման համար ներմուծվող ապրանքների մասով ակնկալվում է ԱԱՀ-ի գումարների` երեք տարի ժամկետով հետաձգում:

Նախատեսում է ներդրումներ իրականացնել շուրջ 3.31 մլրդ ՀՀ դրամի չափով, որից մոտ 120.5 մլն ՀՀ դրամը` սարքավորումներ ձեռք բերելու համար:

Ներդրումային ծրագրի իրագործման արդյունքում կստեղծվի մոտ 40 աշխատատեղ` միջին աշխատավարձը 2016թ.` 80, 2017թ.` 85 և 2018թ.` 90 հազ. դրամ: