Իրավապահները դեռ չեն հայտնաբերել Կախյանների տունը հրկիզած անձին

ՀՀ քննչական կոմիտեի Լոռու մարզային քննչական վարչությունում շարունակվում է սպանության մեղադրանքով հետախուզման մեջ գտնվող Ա.Կախյանի տունը հրկիզելու դեպքի առթիվ հարուցված քրեական գործի քննությունը:

Yerkir.am-ի գրավոր հարցմանն ի պատասխան, ՀՀ քննչական կոմիտեի դեպարտամենտի տեղեկատվության և հասարակայնության հետ կապերի վարչությունից հայտնեցին, որ այս գործով ներգրավված կասկածյալ կամ ձերբակալված դեռևս չկա:

Նշենք, որ տան սեփականատեր Արմեն Կախյանը հետախուզվում է Վահագնի գյուղի բնակիչ` 44-ամյա Նվեր Քոչինյանին հրազենով սպանելու կասկածանքով: Շրջանառվող տեղեկությունների համաձայն՝ տունը հրկիզել են հենց Քոչինյանի մտերիմները, սակայն մինչ այժմ իրավապահներին չի հաջողվում կոնկրետ անձի մեղադրանք առաջադրել:

Ավելի վաղ հայտնել ենք, որ դեպքի առթիվ 2016 թվականի փետրվարի 27-ին Լոռու մարզային քննչական վարչությունում ՀՀ քրեական օրենսգրքի 185-րդ հոդվածի 2-րդ մասի 1-ին կետով հարուցվել է քրեական գործ (հրկիզման եղանակով գույքի դիտավորյալ ոչնչացում): Նշանակվել են համալիր դատահրդեհատեխնիկական, դատաապրանքագիտական, ինչպես նաև դատաձգաբանական փորձաքննություններ, որոնց պատասխանները դեռ չեն ստացվել: Կազմվել է հանցագործության բացահայտման ուղղությամբ համատեղ ձեռնարկվելիք քննչական գործողությունների և օպերատիվ-հետախուզական միջոցառումների պլան, հանձնարարություններ են տրվել հետաքննության մարմնին, հանցագործության բացահայտման ուղղությամբ կատարվում են լայնածավալ քննչական և դատավարական այլ գործողություններ: