Ավտոմեքենաների պետհամարանիշներում հնարավոր կլինի օգտագործել G և X տառերը

Այսօր կառավարության նիստում ներկայացվեց որոշում 2007 թվականի հուլիսի 19-ի «Տրանսպորտային միջոցների հաշվառման մեծ պահանջարկ ունեցող համարանիշերի չափորոշիչները սահմանելու մասին» N 816-Ն որոշման մեջ փոփոխություններ անելու մասին, որով հնարավոր կլինի համարանիշներում օգտագործել G և X տառերը: Որոշման ընդունման անհրաժեշտությունը պայմանավորված է այն հանգամանքով, որ հետաքրքրություն ներկայացնող և մեծ պահանջարկ ունեցող համարանիշները գրեթե սպառվել են:

Հովիկ Աբրահամյանը նախագիծը ներկայացնող` փոխոստիկանապետ Վարդան Եղիազարյանից հետաքրքրվեց, թե որքա՞ն եկամուտ են ստացել այդ պետհամարանիշների վաճառքից: Վարդան Եղիազարյանը նշեց, որ այս պահին հստակ չի կարող ասել, բայց անցյալ տարի բավական մեծ գումար է եղել: «Այս գոյացած գումարները գնում են պետական տուրք»,- ասաց փոխոստիկանապետը:

«Արտաբյուջե է գնում, դուք եք ծախսում այդ գումարները»,- արձագանքեց Հովիկ Աբրահամյանը: