Ինքնասպանության փորձ կատարած 29-ամյա երիտասարդի վիճակը ծայրահեղ ծանր է

Հայտնել ենք, որ երեկ Երևանի Մոլդովական փողոցի թիվ 44/3 շենքի մոտակա ավտոտնակում ինքնաշեն հրազենով գլխին է կրակել 29-ամյա Ս. Ա.-ն: Նրան անմիջապես հոսպիտալացրել են: Նախնական տեղեկություններով` երիտասարդը փորձել է ինքնասպանություն գործել, արարքից առաջ նա սեղանին նամակ է թողել, որում նշել է նման քայլի դիմելու պատճառները:

Yerkir.am-ի հետ զրույցում «Սբ Գրիգոր Լուսավորիչ» բժշկական կենտրոնից հայտնեցին, որ տուժածն անգիտակից վիճակում գտնվում է հիվանդանոցի վերակենդանացման բաժանմունքում, նրա վիճակը ծայրահեղ ծանր է, բժիշկները պայքարում են երիտասարդի կյանքի համար:

Ավելի վաղ հայտնել ենք, որ երեկ` ժամը 19.32-ին, ահազանգ է ստացվել, որ Երևանի Մոլդովական փողոցի ավտոտնակներից մեկում 29 տարեկան երիտասարդը ցանկանում է ինքնասպան լինել: Պարզվել է, որ դեռևս չբացահայտված հանգամանքներում 1987 թ. ծնված Ս. Ա.-ը քունքին ստացած հրազենային վնասվածքով շտապօգնության աշխատակիցների կողմից հոսպիտալացվել է «Սբ Գրիգոր Լուսավորիչ» բժշկական կենտրոն: