Տավուշի մարզում կրակոցները մի քիչ շատացել են. նախարար

Սահմանին իրավիճակը վերահսկվում է, լարվածությունը թուլացել է. այսօր լրագրողներին ասաց պաշտպանության նախարար Սեյրան Օհանյանը:

«2016 թվականի սկզբին մի քանի անգամ կրակոցները եղել են` շատ, բայց այս օրերին այդ լարվածությունը նվազել է: Չգիտես` ինչու, Տավուշի մարզում կրակոցները մի քիչ շատացել են: Տեղի հրամանատարությունը վերահսկողում է, և այնտեղ մենք համապատասխան միջոցառումներ ձեռնարկում ենք: Եթե հանկարծ նրանք շարունակեն, կսկսենք նաև զսպման միջոցառումներ իրականացնել: Մենք համանախագահող երկրներին հորդորել ենք և այսօր ՀԱՊԿ-ին էլ ենք ասում, որ, ըստ հնարավորության, այդ գնահատականները, քննադատությունները թիրախավորված լինեն այն կողմի վրա, ովքեր խախտում են անում»,- ասաց նա:

Սարսանգի ջրամբարի վերաբերյալ զեկույցին անդրադառանալով` Օհանյանը նշեց.  «Կարծում եմ, որ ՀՀ քաղաքական ուժերը համապատասխան աշխատանք իրականացրել են, որպեսզի այդ նախագծերը չանցնեն, այդ նախագծերը կողմնակալ նպատակ ունեն: Եթե այդպես չլիներ, ապա նույն Սարսանգի ջրամբարին առնչվող հարցում նրանք կընդառաջեին ԼՂՀ ղեկավարության նախաձեռնողականությանը, որը տարբեր ժամանակներում արտահայտվել է, նույնիսկ` այն ժամանակ, երբ ես ծառայում էի: Կան համապատասխան պոմպակայաններ և ջրագծեր, որոնք պետք է համատեղ վերանորոգել և օգտագործել: Բայց նրանք հրաժարվել են, իսկ այն, ինչ այսօր կատարվում է Սարսանգի ջրամբարի հետ, ԼՂՀ ղեկավարությունն իրականացնում է ի հնարավորության սահմաններում` կատարելով բոլոր գոյություն ունեցող միջազգային նորմերը»: