Մեկ-երկու ամիս հետո կարող է շատ բան փոխվել. ԲՀԿ

Այսօր խորհրդարանում լրագրողների հետ զրույցում ԱԺ ԲՀԿ-ական պատգամավոր Միքայել Մելքումյանը նշեց, որ 2017 թվականի խորհրդարանական ընտրություններին ԲՀԿ-ին կհաջողվի հաղթահարել շեմը և մտնել խորհրդարան:

Նա համոզված է, որ ԲՀԿ-ն ազդեցիկ քաղաքական ուժ է և կարող է քաղաքացիներից ստանալ իր քվեն: «2017 թվականին նախորդող ժամանակշրջանում կխոսենք, բայց ես համոզված եմ, որ մենք միանշանակ ազդեցիկ քաղաքական ուժ ենք: Փետրվարյան իրադարձություններից հետո ԲՀԿ-ն տուժել է, սակայն մեզ հաջողվել է փրկել մեր գրասենյանկերը, որ չփակվեն:

Մենք նաև ամուր ենք, մեր կառույցները կան, մեր հիմնական ներուժը մեր կառույցներն են, ժողովուրդն է, մեր անդամներն են, տարածքային գրասենյակներն են և այն աշխատանքն է, որ մենք անում ենք: Հիմա կյանքը ցույց կտա, կարող է` մեկ կամ երկու ամիս հետո շատ բան փոխվի»,- ասաց նա: Հարցին, թե ԲՀԿ-ն քննարկե՞լ է արդյոք ՀՀԿ-ի հետ կոալիցիա կազմելու հարցը կամ իրենց կոալիցիա կազմելու առաջարկ եղե՞լ է, Մելքումյանը պատասխանեց.

«Մենք քննարկել ենք, թե քաղաքական մեծամասնություն-Դաշնակցություն ապագա կոալիցիայի պայմաններում նոր քաղաքական իրավիճակում «Բարգավաճն» ի՞նչ ստրատեգիա, տակտիկա է ընտրում: Ոչ թե քննարկել ենք` մենք գնում ենք, թե չենք գնում, մի բան, որ չկա ո՞ւր գնանք կամ չգնանք»: