Օդանավի պատկանելությունը հնարավոր չէ պարզել. Մոսկվան հերքում է օդային սահմանը խախտելու` Անկարայի մեղադրանքները

ՌԴ ՊՆ-ն հերքել է այդ տեղեկատվությունը, թե ռուսական ռազմական օդանավը հատել է Թուրքիայի օդային սահմանը: Մոսկվան Անկարայի այդ հայտարարությունն անվանել է «մերկապարանոց քարոզչություն»:

 «Վստահ եմ, որ նույնիսկ Թուրքիայի ՀՕՊ մասնագետները գիտեն, որ ռադիոլոկացիոն կայանները, որոնք իրականացնում են օդային տարածքի վերահսկողություն, կարող են արձանագրել միայն  թռչող օբյեկտի արագությունը, ուղղությունը եւ բարձրությունը:  Որեւէ նման սարք չի կարող  որոշել թռչող օբյեկտի պատկանելությունը կամ տեսակը, պարզել` այն ռուսական է, թե ԱՄՆ-ի գլխավորած «դաշնակիցներինը»: Այդ մասին հայտարարել է ՌԴ ՊՆ պաշտոնական ներկայացուցիչ, գեներալ մայոր Իգոր Կոնաշենկովը: Նա նշել է, որ  օբյեկտի պատկանելությունը հնարավոր է պարզել միայն  անմիջական տեսողական կոնտակտի միջոցով` այլ ինքնաթիռից, ինչը չի եղել:  Գեներալ մայորը նաեւ հերքել է, թե թուրքական կողմը թուրքերենով եւ անգլերենով նախազգուշացումներ է արել` շեշտելով, որ  ռուս օդաչուները  թուրքական կողմից որեւէ ձայնային ազդանշան վաղուց չեն ստանում:

Միեւնույն ժամանակ ՆԱՏՕ-ի գլխավոր քարտուղար Յեն Սթոլթենբերգը հայտարարել է, որ  ռուսաստանյան օդանավն իսկապես հատել է Թուրքիայի սահմանը`  ընդգծելով, որ Ռուսաստանը պետք է հարգի ՆԱՏՕ-ի օդային տարածքը, որի անդամ է Թուրքիան: