Հայկական բանակն ամեն օր իր քննությունը գերազանց է հանձնում. Սեյրան Օհանյան

Այսօր` հունվարի 28-ին, Հայոց բանակի օրը, «Եռաբլուր» պանթեոն են այցելել երկրի առաջին դեմքերը: 

Լրագրողների հետ զրույցում ՀՀ պաշտպանության նախարար Սեյրան Օհանյանը շնորհավորեց բոլորին օրվա կապակցությամբ:

«Պետք է անենք ամեն ինչ` բանակի հետ միասին մեր ժողովրդի անվտանգությունն ապահովելու համար: Խորհրդանշական է, որ առաջինը մենք այցելում ենք Եռաբլուր՝ մեր մարտական ընկերներին ևս շնորհավորելու, նրանց հարազատներին շնորհավորելու: Նրանցից յուրաքանչյուրի անունը լսելիս մեր միջով սարսուռ է անցնում: Ցավն ու սխրանքը շաղախվում, դառնում են հպարտություն մեր մարտական ընկերների և բանակի համար, հետո կարծրացնում, դառնում պատասխանատվություն՝ այսուհետ սխալներ չգործելու համար»,- ասաց Սեյրան Օհանյանը:

 Նա կարծիք հայտնեց, որ բանակի այսօրվա մարտունակությունը թույլ է տալիս ասել, որ հայկական բանակը տարածաշրջանում գործունակ ու մրցունակ բանակ է, այն հաղթանակած բանակ է: «Ամեն օր Արցախում, մեր սահմաններին, շփման գծում իր առջև դրված քննությունը հանձնում է գերազանց կերպով»,- ասաց նախարարը: