Հայաստան-Իրան-Վրաստան-Ռուսաստան էներգետիկ միջանցքի ստեղծումն իրագործելի է. փոխնախարար

Այսօր լրագրողների հետ զրույցում ՀՀ էներգետիկայի փոխնախարար Արեգ Գալստյանն անդրադարձավ ոլորտին առնչվող մի քանի հարցերի:

Խոսելով երեկ Երևանում անցկացված` Հայաստանի, Վրաստանի, Իրանի և Ռուսաստանի էներգետիկայի նախարարությունների համատեղ նիստի մասին, որը նվիրված էր տարածաշրջանային էներգետիկ համագործակցության զարգացման հեռանկարներին, փոխնախարարը նշեց, որ Հայաստանի, Ռուսաստանի, Վրաստանի և Իրանի էներգետիկ գերատեսչությունների միջև պայմանավորվածություն է ձեռք բերվել էլեկտրաէներգետիկ միջանցք ստեղծելու վերաբերյալ: Հայաստանն ունի հնարավորություն էլեկտրաէներգիայի  սեզոնային փոխանակումներ իրականացնելու Իրանի, Վրաստանի, ԵՏՄ երկրների հետ, բացի դրանից` կան տրանզիտային փոխանակումներ:

«Հյուսիս-հարավ էներգետիկ միջանցքի ստեղծումը շատ կարևոր է չորս երկրների համար ու իրագործելի: Իրանի հետ էլեկտրահաղորդակցման գիծը, որը հիմա կառուցման փուլում է,  երկշղթյա` 400 կվոլտ լարմամբ գիծ է, որը հնարավորություն է տալու գումարային առումով մինչև 1200 մեգավատտ հզորությամբ տարանցում ապահովել երկու ուղղությամբ: Գազ ստանում ենք, փոխարենը էլեկտրաէներգիա ենք ուղարկում Իրան` հասցնելով այդ թիվը մինչև 6,9 միլիարդ կիլովատտ/ժամի»,- ասաց Գալստյանը: