Ռուսաստանից Իրան գազի մատակարարման նախագիծը լիովին իրագործելի է․ Պուտին

Ռուսաստանի նախագահ Վլադիմիր Պուտինը հայտարարել է, որ Ռուսաստանից Իրան գազ մատակարարելու նախագիծը միանգամայն իրագործելի է։ Բացի այդ, Թեհրանը երկար ժամանակ է, ինչ Մոսկվայից մատակարարումներ է խնդրում, նշել է նա։  Այս մասին գրում է 1tv.ru-ն:

«Իրանը երկար ժամանակ մեզնից մատակարարումներ է խնդրում։ Ես կարծում եմ, որ սա իրագործելի նախագիծ է, նկատի ունեմ, որ շուկաները հսկայական են: Իսկ Իրանի հարևան երկրներում պարզապես ահռելի կարիք կա»,- ասել է Պուտինը Արևելյան տնտեսական ֆորումի լիագումար նիստում։

Ռուսաստանի նախագահը պարզաբանել է, որ «Գազպրոմ»-ը  ծրագրեր ունի միավորելու գազատրանսպորտային համակարգի եվրոպական հատվածը և Հեռավորարևելյան հատվածը՝ համապատասխան հոսքեր իրականացնելու համար։

Համաժողովում Ռուսաստանի ղեկավարի մասնակցությամբ հանդիպումը, որը վերջին տարիներին դարձել է Ասիայի երկխոսության կարևորագույն հարթակներից մեկը, տևել է ավելի քան երեք ժամ։ Վլադիմիր Պուտինն իր ելույթում և դրան հաջորդած քննարկմանը անդրադարձել է կարևոր հարցերի լայն շրջանակի՝ տնտեսությունից մինչև հատուկ ռազմական գործողություն։