Ուրիշի դդմատոնը, սխտորի տոնը նշում ենք, մեր Նոր տարին ուզում են չնշե՞լ. Դավիթ Գասպարյան

Գրականագետ Դավիթ Գասպարյանի կարծիքով`մեր երկրում այս տարի էլ նույն վիճակն էր տիրում: Նա այսօր լրագրողներին ասաց, որ բոլորն էլ գիտակցում են տիրող վիճակի լրջությունը:

«Գիտակցելը մի բան է, այս վիճակից դուրս գալու ծրագրերը` այլ բան: Նույն առօրյան էր, նույն շնորհանդեսները, լուրջ բան չկա, որ ընթերցողին կապենք մեր հող ու ջրին: Գրականությունը դարձել է Չարբախի ձորերում թաքնված բան: Բարձր չեմ գնահատում ընդհանուր վիճակը: Պետք է քայլ անենք»,- ասաց Գասպարյանը` հավելելով, որ մենք դարձել ենք դոնոր ժողովուրդ, մեր տնտեսության մասին չենք մտածում:

«Հումանիտար օգնություն կոչված ձևերին կտրականապես դեմ եմ: Մենք հիվանդ, անկյալ կացության մեջ ենք»,- նշեց նա:

Ըստ Գասպարյանի` Նոր տարին մեր ժողովրդի ամենասիրած տոնն է: «Բոլորն էլ պատրաստվում են այնպես, ինչպես կարողանում են: Ճոխ սեղանների մեջ վատ բան չկա: Ուրիշի դդմատոնը, սխտորի տոնը նշում ենք, մեր Նոր տարին ուզում են չնշե՞լ»,- ասաց նա:

Գասպարյանն անդրադարձավ նաև հանրապետության նախագահի` ՀԱՊԿ գագաթաժողովում ունեցած ելույթին, որը, նրա կարծիքով, շատ լավն էր: «Հասկանում ենք, որ մեր խոսքը տեղ հասցնող կա»,- ասաց նա: