Խախտումների ծագումնաբանությունը դեռ պարզ չէ. ՀՀԿ

Խորհրդարանում լրագրողները ՀՀԿ խմբակցության ղեկավար Վահրամ Բաղդասարյանից այսօր հետաքրքրվեցին, թե ինչ կարծիք ունի հանրաքվեի վերաբերյալ:

Նա նախ ասաց, որ սահմանադրական հանրաքվեի արդյունքներից հետո ՀԱԿ-ն այլ ելք չունի, քան կեղծիքների և ընտրախախտումների մասին խոսելը, որովհետև չունի որևէ պատճառաբանություն: Բնականաբար, ինչ-որ ձև պետք է գտնեին, որպեսզի արդարացնեին իրենց այս ամիսների բարձրացրած խնդիրները, և բոյկոտի ձևն են ընտրել։

«Դեռ պետք է ուսումնասիրվի՝ այդ խախտումներն իրականում ովքեր են կատարել, գուցե դրանք պրովոկացիաներ են եղել»,- ասաց Վահրամ Բաղդասարյանը:

ՀՀԿ խմբակցության ղեկավարը շեշտեց, որ շատ խիստ հանձնարարական կա՝ իրավապահ մարմինները պետք է մանրակրկիտ ուսումնասիրեն արձանագրված խախտումները։

Հարցին՝ խախտումների վերանայումը կազդի՞ հանրաքվեի արդյունքների վրա, նաը բացասական պատասխան տվեց՝ նշելով. «Դրանք բացարձակապես չեն կարող ազդեցություն ունենալ, որովհետև, եթե ինքներդ ուսումնասիրեք և համոզվեք դրա մեջ, թե ինչ խախտումներ են արձանագրված․․․ Եվ դեռ պարզ չէ այդ խախտումների ծագումնաբանությունը»: