Չթարմացնել Սահմանադրությունն ու ակնկալել փոփոխություններ՝ հնարավոր չէ. Արտակ Զաքարյան

Այսօր լրագրողների հետ հանդիպման ժամանակ ԱԺ արտաքին հարցերի մշտական հանձնաժողովի նախագահ, ՀՀԿ-ական Արտակ Զաքարյանն անդրադարձավ սահմանադրական փոփոխություններին: Նրա խոսքով՝ թե\' հասարակությունը, թե\' քաղաքական ուժերն այսօր գտնվում են բավական պատասխանատու և բարդ փուլում, որովհետև սահմանադրական փոփոխությունները դրականորեն են անդրադառնալու պետության կառավարման, պետություն-քաղաքացի լիարժեք իրավահարաբերություններ ապահովելու վրա:

Արտակ Զաքարյանի կարծիքով՝ առաջարկվող սահմանադրական փոփոխությունները, քննարկումներով ու առաջարկություններով հանդերձ, լիովին համապատասխանում են երկրի առջև ծառացած խնդիրների լուծմանը:

«Եթե մի երկրում պետք է տեղի ունենան համակարգային փոփոխություններ, ապա դրա իրատեսական ճանապարհը, իհարկե, սահմանադրական փոփոխություններն են, որոնք կբերեն կառավարման ձևի փոփոխության՝ ԱԺ-ն դարձնելով իրական ներկայացուցչական մարմին, քաղաքական ուժերին հնարավորություն տալով կայանալ, զարգանալ, դառնալ քաղաքական միտք ձևավորողներ, այլ ոչ թե քաղաքական խմբավորումներ»,- ասաց պատգամավորը՝ հավելելով, որ խորհրդարանական կառավարման ձևը ներկայացուցչական կառավարման լավագույն մոդելն է, ինչն էլ դեպի ժոովրդավարություն ևս մեկ խոշոր քայլ է:

Զաքարյանը կարծում է, որ միշտ էլ բարեփոխումներ իրականացնող քաղաքական ուժից դժգոհ են լինում բոլոր երկրներում, բայց գնալով սահմանադրական փոոփոխությունների, երկիրը գնում է համակարգային փոփոխության: Ըստ նրա՝ սոցիալական առումով էլ քաղաքացին լինելու է ավելի պաշտպանված, քանի որ ԱԺ-ն ունենալու է կառավարության վրա բավարար ազդեցություն, մինչդեռ՝ այսօրվա համակարգում տեսնում ենք, որ ընդդիմությունը չի կարողանում լիարժեք ազդել կառավարության վրա:

«Առաջարկվող փոփոխություններով՝ քաղաքական և տնտեսական խնդիրների լուծման համար փորձելու ենք ունենալ այնպիսի խորհրդարան, որը կայուն մեծամասնություն ունենալու պարագայում ձևավորվի կառավարություն, որն ունենալու է ուժերի հավասարակշռության բոլոր հնարավորությունները»,- ասաց Արտակ Զաքարյանը՝ հավելելով, որ առաջիկայում Հանրապետական կուսակցությունը փորձելու է ժողովրդին անկեղծ, պարզ ու շիտակ ներկայացնել  սահմանադրական փոփոխությունները:

Հարցին, թե ի՞նչ տրամադրություն ունեն այսօր հասարակության լայն շերտերը սահմանադրական փոփոխությունների վերաբերյալ, պատգամավորը պատասխանեց, որ իշխող ուժն այսօր դեռ մեծ աշխատանք ունի անելու տեղեկատվական, քարոզչական դաշտում, սահմանադրական փոփոխությունները մարդկանց ներկայացնելու դաշտում: «Իրականում հասարակությունը դժգոհ է, բայց դա կապել Սահմանադրության հետ՝ սխալ մոտեցում է, որովհետև չթարմացնել Սահմանադրությունը ու ակնկալել փոփոխություններ՝ հնարավոր չէ»,- ասաց նա: