Նախագահի կողքին կանգնելու եմ, ինչ պետք ա` անելու եմ Սահմանադրության համար, ֆսյո. Կարո Կարապետյան

Հայաստանի քաղաքական ուժերը սկսում են սահմանադրական հանրաքվեի քարոզարշավը: Երեկ արդեն պարզ դարձավ, որ սահմանադրական հանրաքվեի «Այո»-ի շտաբի պետք է նշանակվել վարչապետ Հովիկ Աբրահամյանը: Խորհրդարանական ուժերից ՀՅԴ-ն առանձին է անցկացնելու «Այո»-ի քարոզարշավը: ԲՀԿ-ն էլ հայտարարել է, որ կմիանա Հանրապետական կուսակցության նախաձեռնած քարոզարշավին:

Yerkir.am-ը փորձեց պարզել` արդյո՞ք քարոզարշավին իր մասնակցությունը կունենա ԲՀԿ խմբակցության անդամ, անկուսակցական Կարո Կարապետյանը: Նա նախ հարցրեց, թե ինչո՞ւ ենք հետաքրքրվում` կմասնակցի՞, թե՞ չի մասնակցի: Երբ հիշեցրեցինք, որ ինքը ԲՀԿ խմբակցության պատգամավոր է, կողմ է քվեարկել սահմանադրական հանրաքվեի անցկացմանը, Կարո Կարապետյանն ասաց. «Մասնակցելու եմ, նախագահի կողքին կանգնելու եմ, իրան շատ հարգում, սիրում եմ, ինչ պետք ա` պիտի անեմ Սահմանադրության համար, ֆսյո»: