Մամեդյարովի պաշտոնանկության մասին որոշում է կայացվել. minval.az

Ադրբեջանի ԱԳՆ ղեկավար Էլմար Մամեդյարովի գործունեությունը լրջորեն քննարկվում է իշխանական շրջանակներում. գրում է ադրբեջանական minval.az-ը` իր աղբյուրներին հղումով։

Ըստ կայքի` իշխանությունները դժգոհ են ԱԳՆ-ի աշխատակիցների անվան հետ կապված կոռուպցիոն սկանդալներից, ինչպես նաև Արևմուտքի` Ադրբեջանի նկատմամբ վերաբերմունքից, որի պատճառներից մեկը, ըստ նրանց, Մամեդյարովի պասիվությունն է:

Պարբերականը գրում է, որ, իրեն հասած տեղեկություններով, իշխանություններն արդեն կայացրել են Մամեդյարովի պաշտոնանկության մասին որոշումը:

Հաղորդվում է նաև, որ այս պաշտոնում նրան կարող է փոխարինել Արազ Ազիմովը։ Թեև նա դիվանագիտական կրթություն չունի, սակայն երկար տարիներ աշխատել է Ադրբեջանի ԱԳՆ-ում։ Ազիմովը դեռևս Հեյդար Ալիևի օրոք զբաղեցնում էր Ղարաբաղի հարցով հատուկ լիազոր ներկայացուցչի պաշտոնը և,  ի տարբերություն Մամեդյարովի, ավելի կոշտ հայտարարություններով է հանդես գալիս։