Ինչ չի կարելի առնել քիչ փողով, կարող են առնել շատ փողով

Արդեն տեղեկացրել ենք, որ քիչ առաջ  «Նուբարաշեն» ՔԿՀ-ից ազատ է արձակվել մայիսի 2-ին Գորիսի Սդղի գյոլ կոչվող տարածքում տեղի ունեցած միջադեպի համար կալանավորված Տիգրան Խաչատրյանը` Սուրիկ Խաչատրյանի որդին:

Նշենք, որ երեկ քննչական կոմիտեն միջնորդություն էր ներկայացրել դատախազություն՝ Տ. Խաչատրյանի խափանման միջոց կալանավորումը փոխելու հարցով, որը, փաստորեն, բավարարվել է: Նման միջնորդության համար հիմք էր հանդիսացել տուժող Հարություն Զաքարյանի կողմից ցուցմունքը փոխելը: Դեռևս սեպտեմբերի 22-ին հարցաքննության ժամանակ Հարություն Զաքարյանը չի պնդել, որ Տիգրանն է իրեն հարվածել, և հայտնել է, որ եթե «Յուրան ասում է, ուրեմն նա է»: Խոսքն այս գործով կալանավորված մեկ այլ մեղադրյալի՝ Յուրա Մանուչարյանի մասին է, ով խոստովանել է, որ ինքն է հարվածել Հարություն Զաքարյանին:

 Yerkir.am-ի հետ զրույցում «Ժառանգություն» կուսակցության անդամ, Երևանի ավագանու անդամ Անահիտ Բախշյանը նշեց, որ այս անգամ զարմացել է ոչ թե Սուրիկ Խաչատրյանի որդուն ազատ արձակելու փաստից, այլ տուժողի վարքագծից` ցուցմունքը փոխելու հետ կապված:

«Ուրեմն` Սուրիկ Խաչատրյանն ու իր շառավիղը կարող են խփել, ծեծել, կրակել, հազար տեսակի անօրինականություն անել ու առնել բոլորին շատ փողով: Ինչպես հայտնի ասացվածքն է ասում. «Ինչ որ չի կարելի առնել քիչ փողով, կարող են առնել շատ փողով»: Բայց ո՞նց են առնում,  գլուխս չի մտնում, չեմ կարողանում հասկանալ: Ո՞նց տուժողը փոխեց իր ցուցմունքը: Իսկ էդ շատ փողը ո՞նց են կուտակում, ո՞նց են դիզում, բոլորս գիտենք: Այսինքն` էս պահին ավելի շատ ապշած եմ տուժող Զաքարյանների վարքից: Խաչատրյան Սուրիկն էլ օգտվել է որոշ բաներից»,- ասաց մեր զրուցակիցը: