Հայաստանը պետք է հստակ պահանջներ դնի

Արդեն տեղեկացրել ենք, որ ԵԱՀԿ Մինսկի խմբի ամերիկացի համանախագահ Ջեյմս Ուորլիքը հանդես է եկել ուշագրավ հայտարարությամբ, որում Ադրբեջանին հորդորել է ընդունել մեխանիզմները, որոնք կօգնեն թուլացնել լարվածությունը և, որ առավել կարևոր է, խուսափել քաղաքացիական զոհերից: Ուորլիքը նաև հորդորել է Հայաստանին` ընդունել Ադրբեջանի հրապարակային կոչերը Մինսկի խմբի համանախագահների հովանու ներքո անկեղծ բանակցային գործընթաց ծավալելու վերաբերյալ, որը կարող է հանգեցնել տևական, խաղաղ կարգավորման:

Միջազգային և անվտանգության հարցերի հայկական ինստիտուտի ղեկավար, քաղաքագետ Ստյոպա Սաֆարյանը Yerkir.am-ի հետ զրույցում ասաց, որ Ուորլիքի այս առաջարկը մանրակրկիտ ուսումնասիրության առարկա է: «Եթե խոսվում է նոր բանակցություն սկսելու մասին, ապա Հայաստանը պետք է հստակ պահանջներ դնի և ոչ թե բանակցի նախկին սկզբունքների շրջանակներում: Պետք է ԼՂՀ անկախության  ճանաչման խնդիրը դրվի` անկախ որևէ այլ կոմպոնենտից` տարածքային վեճեր և այլն»,- ասաց նա:

Սաֆարյանի կարծիքով` երբ  այդ խնդիրը կդրվի ու այն կբավարարվի, նոր արդեն Հայաստանը այդ հարցերը կարող է քննարկել: «Այնպես չէ, որ միանգամից պետք է ասենք` վա~յ, ի՞նչ բանակցություններ: Ի վերջո, պետք է հասկանանք, որ Մինսկի խմբի ֆորմատը ոչ միայն կարևոր է համանախագահների և Արևմուտքի համար, այլ նաև Հայաստանի համար»,- նշեց նա: