Այսուհետ վարկային արտոնյալ ծրագրից կարող է օգտվել նաև ՊՆ, ԱԱԾ և ոստիկանության շարքային, ենթասպայական անձնակազմը

Կառավարության` օգոստոսի 31-ի նիստի օրակարգում ֆինանսների նախարարությունն ընդգրկել է որոշման նախագիծ, ըստ որի` առաջարկվում է ՀՀ կառավարության 2013 թվականի մայիսի 23-ի որոշմամբ` ՀՀ ՊՆ, ԱԱԾ  կրտսեր, միջին, ավագ և ոստիկա­նու­թյան միջին, ավագ, գլխավոր սպայական անձնակազմին կեն­ցաղային տեխնիկայի ձեռք բեր­մանն աջակցելու նպատակով ՀՀ առևտրային բան­կերի կող­մից սպառողական վարկերի տրամադրման հատուկ վարկային ծրագրով սահմանված վարկի գումարի 500.000 դրամ առավելագույն սահմանաչափը շահառուների մի մասի համար դարձնել 1.000.000 դրամ, ծրագրի շահառուների շրջանակն ընդլայնել, ինչպես նաև ծրագրում ընդգրկել ԼՂՀ-ում գործող կենցաղային տեխնիկայի վաճառք իրականացնող տնտեսվարող սուբյեկտները:

Ֆինանսների նախարարությունը համարում է, որ նախագծի ընդունման ազդեցությունը ՀՀ պետական բյուջեի եկամուտների վրա կարող է լինել դրական, քանի որ կաճեն բանկերի կողմից տրամադրվող սպառողական վարկերի, ինչպես նաև կենցաղային տեխնիկայի վաճառքի ծավալները, ինչի արդյունքում կաճեն նաև բանկերի և կենցաղային տեխնիկա իրացնող հարկ վճարողների շահույթը և ՀՀ պետական բյուջե վճարվող հարկերը: Նախագծի ընդունմամբ պետական բյուջեի ծախսային մասով նախատեսվում է ծախսերի ավելացում:

Ելնելով նրանից, որ ծրագիրը շարունակում է ունենալ պահանջարկ, ինչպես նաև հիմք ընդունելով ՀՀ պաշտպանության նախարարության և ՀՀ կենտրոնական բանկի կողմից ներկայացված առաջարկությունը, համաձայն որի` նախատեսվում է Ծրագրով սահմանված վարկի գումարի 500.000 ՀՀ դրամ առավելագույն սահմանաչափը շահառուների մի մասի համար դարձնել 1.000.000 ՀՀ դրամ, իսկ Ծրագրի շահառուների շրջանակն ընդլայնել` ներառելով ՀՀ պաշտպանության նախարարության շարքային, ենթասպայական կազմը (բացառությամբ պարտադիր ժամկետային զինծառայողների), ՀՀ կառավարությանն առընթեր ՀՀ ազգային անվտանգության ծառայության ենթասպայական կազմը և ՀՀ կառավարությանն առընթեր ՀՀ ոստիկանության կրտսեր կոչմամբ ծառայողներին: Նախագծի ընդունումը նախատեսում է ծախսեր պետական բյուջեում, որոնց չափը, ըստ ֆինանսների նախարարության,  ներկա փուլում ստույգ գնահատելի չէ` հաշվի առնելով այն, որ հնարավոր չէ կանխատեսել ծրագրին փաստացի մասնակցել ցանկացող շահառուների թիվը: