No comment. Համալիրի ճարտարապետական լուծումները լինելու են կախարդական գորգի թեմաներով

Կարեն Դեմիրճյանի անվան մարզահամերգային համալիրը «ՆՏԱԱ Ինվեստմենտ Գրուպ» ՍՊ ընկերությանն օտարելու կառավարության երեկվա որոշումը բուռն քննարկումների առիթ է դարձել: Բոլորին հետաքրքրում է, թե ո՞վ է Համալիրի իրական գնորդը, ինչպե՞ս և ի՞նչ պայմաններով է աճուրդն իրականացվել:

Հասարակությանը պակաս չի հուզում ընկերության ներկայացրած ներդրումային ծրագիրը, որով նախատեսվում է «Համալիրի տարածքում ստեղծել ընտանեկան ուղղվածության համալիր կենտրոն, որը ներառելու է հյուրանոցներ, փակ ջրաշխարհ, համերգային դահլիճներ, հանդիպումների սրահներ, ռեստորաններ, խանութներ և ուշադրություն` խաղատուն»: Ըստ այդ ծրագրի՝ հյուրանոցներն ունենալու են 350-ից ավելի «ընտանեկան ոճի սենյակներ»: Փակ ջրային ատրակցիոնը ունենալու է ավելի քան 18.000 քմ մակերես, աշխատելու է 12 ամիս:

Ուշադրության է արժանի որոշման այս հատվածը. «Համալիրի ճարտարապետական լուծումները լինելու են կախարդական գորգի թեմաներով, որը յուրաքանչյուր ծնող ցանկանում է վայելել իր երեխաների հետ և դարձնել երկար տարիների հիշողություններ»: Թե ինչպիսի ճարտարապետական լուծումների մասին է խոսքը, դժվար է հիմա կռահել, քանի որ անգամ համալիրի համահեղինակ ճարտարապետներն են խոստովանում, որ այդ ամենն իրենց երևակայության սահմաններում չի տեղավորվում:

Ուշագրավ մի դիտարկում եւս. նախագծի հեղինակները համոզված են, որ ծրագրի շնորհիվ մոտ 1 մլն այցելու կայցելի Հայաստան, «և ամենակարևորը, Համալիրը կապահովի ընտանիքների այցելություն Հայաստան»: Նշենք, որ ծրագիրը նախատեսվում է իրականացնել առավելագույնը 4 տարվա ընթացքում: