Գյումրու ըմբշամարտի մարզադպրոցը շարունակում է մնալ անմխիթար վիճակում (տեսանյութ)

Գյումրու քաղաքապետարանի հունահռոմեական ըմբշամարտի մարզադպրոցը կամ մենապայքարային մարզաձևերի նախկին մարզադպրոցը, որն արդեն ունի 26 տարվա պատմություն, շարունակում է մնալ անմխիթար վիճակում: Մարզադպրոցի մոտ 300 սաներ մարզվում են հակահիգիենիկ պայմաններում: Դպրոցն ամբողջությամբ վերանորոգման կարիք ունի: Մարզվելու համար այստեղ չկան նույնիսկ ամենատարրական պայմանները: Մարզասրահի հատակն ամբողջությամբ փոշեծածկ է, պատերը կիսախարխուլ վիճակում են: Մարզումներն անցկացվում են մոտ 100 տարվա վաղեմության գույքով:

Հենց այսպիսի պայմաններում են մարզվում նաև աշխարհի չեմպիոն Արթուր Ալեքսանյանը և  Եվրոպայի երիտասարդական առաջնության չեմպիոն Կարապետ Չալյանը:

Չնայած տված բազմաթիվ խոստումներին, այնուամենայնիվ, մարզադպրոցում դեռևս ոչինչ չի արվել: Վերանորոգման ծրագիրը վաղուց է հանձնվել սպորտի նախարարությանը: Այս տարի մարտից պետք է սկսվեին շինարարական աշխատանքները,  բայց այդպես էլ ոչինչ չի արվել: 

 Մանրամասները դիտեք Yerkir.am-ի տեսանյութում: 

Երվանդ ՀԱԿՈԲՅԱՆ