Տղան տուն է վերադարձել տասը տարվա ազատազրկումից հետո և հայտնվել ցայտնոտի մեջ

Տասը տարվա ազատազրկումից հետո տուն վերադարձած տղան հայտնվում է ցայտնոտի մեջ` մայրը դարձել է հարբեցող: Հենց այս մասին է պատմում Տաթև Հակոբյանի «Օտարը» ֆիլմը, որն ընդգրկվել է «Ոսկե ծիրան» կինոփառատոնի «Կորիզ» կարճամետրաժ ֆիլմերի մրցույթում:

Լրագրողների հետ հանդիպման ժամանակ Հակոբյանը նշեց, որ «Օտարը» հոգեբանական ֆիլմ է, և այն իր երկրորդ ֆիլմն է:

«Իրականում տղան գիտի` ինչն է պատճառը մոր` հարբեցող դառնալու. բանն այն է, որ մայրը սպանել էր հորը, իսկ մեղքն իր վրա էր վերցրել ինքը` տղան: Տուն վերադառնալուց հետո` տղան հոգեկան բարդ վիճակում է հայտնվում` փորձում է մորը հարցնել, թե ինչու նա այդ տասը տարիների ընթացքում այդպես էլ չի այցելել իրեն: Մայրը տղայի մեջ տեսնում էր իր ամուսնուն և դա էր պատճառը, որ չէր ընդունում նրան»,-ասաց Հակոբյանը:

Ըստ նրա, ֆիլմն անվանվել է «Օտարը», քանի որ ֆիլմի գլխավոր հերոսը մի մարդ է, ով մինչև վերջ օտար է մնում իր մոր համար, և անգամ նրա զոհողությունը` մեղքն իր վրա վերցնելը, արժեզրկված է:

Հակոբյանը տեղեկացրեց նաև, որ ֆիլմն իր դիպլոմային աշխատանքն է, որը ստեղծել է Ռոման Բալայանի բարձրագույն ռեժիսորական դասընթացի ավարտին: