Թուրքիայում 400 մտավորական զեկույց է ստորագրել՝ թերթի խմբագրին ցմահ ազատազրկումից ազատելու համար

Թուրքիայի ազգային հետախուզության բեռնատարներով Սիրիա զինամթերք տեղափոխելու մասին հրապարակումների և նախագահ Ռեջեփ Թայիփ Էրդողանի դեմ «զրպարտությունների» համար կրկնակի ցմահ և 42 տարվա ազատազրկման պահանջ էր ներկայացվել Cumhuriyet թերթի խմբագիր Ջան Դյունդարի նկատմամբ:

Ըստ Demokrathaber-ի՝ թուրք խմբագրին աջակցելու համար «Մենք՝ քաղաքացիներս» վերնագրով համատեղ զեկույց է ներկայացվել, որը ստորագրել է մոտ 400 մտավորական` իրավապաշտպաններ, լրագրողներ, գրողներ և մարդու իրավունքների պաշտպաններ:

Զեկույցում մասնավորապես ասվում է. «Մենք՝ քաղաքացիներս, ցանկանում ենք, որ բացահայտվեն որոշ ժամանակ առաջ Սիրիա ապրանք տեղափոխող` ազգային հետախուզության բեռնատարների լուսաբանման մասին դրված արգելքներն ու պետական գաղտնիքի վերածված այդ մութ զարգացումները»:

Զեկույցում կոչ են արել դատախազներին և իրավապահներին՝ դիմադրել Սահմանադրության աջակցությունը վայելող` մամուլի ազատության դեմ ուղղված` Էրդողանի ճնշումներին ու սպառնալիքներին: