Նոր Սահմանադրությամբ` պատգամավորների նվազագույն թիվը կարող է լինել 101, առավելագույնը` 198

Նոր Սահմանադրությամբ նախատեսվում է խորհրդարանում ստեղծել խորհուրդ: Այսօր` լրագրողների հետ հանդիպման ժամանակ, սահմանադրական բարեփոխումների հանձնաժողովի անդամներ Վարդան Պողոսյանն ու Հրայր Թովմասյանը մեկնաբանեցին, թե ինչ է իրենից ներկայացնելու այդ  խորհուրդը:

Վարդան Պողոսյանի խոսքով` այդ խորհրդի գործառույթը լինելու է ԱԺ նախագահին օգնելը` ԱԺ բնականոն գործունեությունը ապահովելու համար: ԱԺ խորհուրդը իրավունք է ունենալու փաստել այն հանգամանքը, որ  պատգամավորը խախտում է համատեղելիության կանոնները և զբաղվում է գործարարությամբ,  նաև` երբ պատգամավորը անհարգելի պատճառներով չի մասնակցում խորհրդարանի նիստերին:

«Բնականաբար, այդ ֆունկցիան կարելի էր թողնել ԱԺ աշխատակազմին, բայց այդ գործառույթն այնքան էլ միանշանակ չէ, և մենք կարծում ենք, որ դա չպետք է լինի աշխատակազմի խնդիրը»,- ասաց Վարդան Պողոսյանը:

Պատգամավորների թիվը, նայած, թե քանի փուլով են անցնում խորհրդարանական ընտրությունները, ֆիքսված չէ. նվազագույնը կարող է լինել 101, իսկ առավելագույնը` տեսականորեն 198, իսկ գործնականում` 130-140-ի շրջանակներում: