Ստեփան Սաֆարյանը կողմ չէ Դավիթ Սանասարյանի հացադուլին

Այսօր լրագրողների հետ զրույցում քաղաքական վերլուծաբան, «Ժառանգություն» կուսակցության անդամ Ստեփան Սաֆարյանն անդրադարձավ այն հարցին, թե արդյո՞ք հնարավոր է հացադուլի միջոցով նորից հավաքել ժողովրդին ու դուրս գալ պայքարի: Հիշեցնենք, որ երեկ «Ժառանգություն» կուսակցության մամուլի խոսնակ Դավիթ Սանասարյանը հացադուլ է սկսել, որն ուղղված է, ինչպես ինքը հայտարարեց, ոչ թե իշխանությունների, այլ հասարակության դեմ, որ նրանք դուրս չեն գալիս պայքարի, և որ հացադուլը կդադարեցնի այն ժամանակ, երբ հասարակությունը դուրս կգա փողոց: 

Ստեփան Սաֆարյանը նշեց, որ կողմնակից չէ հացադուլի տարբերակին: «Շատ սիրելով Դավիթին, նա իմ կրտսեր լավ ընկերն է, այնուամենայնիվ, կողմ չեմ հացադուլին: Զարմանալի էր, որ նա կարող էր նման որոշում կայացնել: Շատ կուզեի, որ երիտասարդները հասկանան, թե ինչու են մարդիկ քիչ դուրս գալիս պայքարի: Այդ կոչերը` մի\' հեռացեք, մի\' գնացեք, մեզ միացեք, այդքան էլ տեղին չեն, որովհետև հասարակությունը ուժ սիրող հասարակություն է, առաջին հերթին մարդիկ պետք է ուժ տեսնեն քո մեջ, որ գան քո հետևից: 10 օր առաջ հասարակությունը տեսավ այդ ուժը այդ մի քանի երիտասարդների մեջ և գնաց նրանց հետևից: Բացի այդ` շատ կարևոր է, որ հասարակությունը ծրագիր տեսնի: Ես պատահական չնշեցի` մինչև հունիս 28-ը, որովհետև մինչ այդ երիտասարդներն ունեին շատ հասկանալի ալգորիթմով ծրագիր, իսկ հիմա մարդիկ հարց են տալիս` լավ, ի՞նչ եք ուզում անել»,- ասաց քաղաքական վերլուծաբանը:

Ստեփան Սաֆարյանը հավելեց, որ հասարակության ճնշումը պետք է ուժեղ լիներ այն օրը, երբ պետք է կայացվեր ՀԾԿՀ որոշումը էլեկտրաէներգիա թանկացնելու վերաբերյալ: Նրա խոսքով` այդ օրը` հունիսի 17-ին, ճիշտ է` բողոքի ակցիա եղավ, մարդիկ հավաքվեցին հանձնաժողովի մոտ, բայց նրանք քիչ էին: Ստեփան Սաֆարյանը նշեց, որ դրա մասին խոսել է «Ոչ թալանին» նախաձեռնող խմբի անդամների հետ, և նրանք ասել են, որ պետք է հասցնեին լավ իրազեկում իրականացնել, ահա` ինչու կարողացան հունիսի 19-ը հայտարարել հավաքի օր, և ոչ` հունիսի 17-ը: 

Նրա կարծիքով` պատահական չէր, որ իշխանությունը նույնպես սկսեց կարևորել հասարակության ընդվզման քայլերը, որովհետև հասկացավ, որ կառավարման ճգնաժամի առաջ է կանգնել, որ էներգետիկ համակարգի խնդիրները շղթայականորեն անդրադառնալու են ամեն ինչի վրա` բիզնես միջավայրի, աղքատության մեծացման,  շուկայի կրճատման, սոցիալական լարվածության, և կստեղծվի  պայթյունավտանգ իրավիճակ, ուստի իշխանությունն էլ է շահագրգռված, որ խնդիրը լուծվի:

Անդրադառնալով երիտասարդների կարգախոսին` «Մենք ենք տերը մեր երկրի», Ստեփան Սաֆարյանը նշեց, որ այդ կարգախոսը մեր ավագ սերնդի կարգախոսի հակառակն է, որովհետև ավագ սերունդն ասում էր` առանց ռուսի չենք կարող ապրել: 

«Հիմա նոր սերունդը բեկում բերեց` ասելով` մենք ենք տերը մեր երկրի, որին հավատացինք, սիրեցինք, թերևս սա շարժման ամենակարևոր հաղթանակից մեկն էր»,- ասաց նա: