Համակիրները դեմ են հացադուլին

Րաֆֆի Հովհաննիսյանի` Ազատության հրապարակում հավաքված համակիրները դեմ են նրա որոշմանը: Ինչպես «Երկիր»-ի հետ զրույցում նշեց 64-ամյա Տիգրան Գրիգորյանը, եթե հացադուլը ժողովրդի համար է, ապա ինքը ժողովրդի անունից թույլ է տալիս իրեն հայտարարելու, որ դեմ է պայքարի նման ձեւին:

«Եթե մեզ համար է անում, պահանջում ենք դադարեցնել հացադուլը: Իշխանության վարած ջայլամի քաղաքականությունից տուժելու է ե'ւ ինքը, ե'ւ մենք»,- ասաց Տ. Գրիգորյանը:

Իսկ ահա 37-ամյա Զարմինե Հարությունյանը նշեց, որ անհրաժեշտ է վերջնագիր ներկայացնել կառավարությանը. «Տալ մեկ օր ժամանակ բարեփոխումների եւ ինչ-ինչ հարցեր կարգավորելու համար: Հակառակ դեպքում կկրկնվի պատկերը, ինչ Հրանտ Դինքի սպանության ժամանակ, այսինքն` համատարած հացադուլ, եւ կհայտարարենք, որ բոլորս էլ Րաֆֆի Հովհաննիսյան ենք»:

Չնայած անձրեւոտ եղանակին եւ Ր. Հովհաննիսյանի`տուն գնալու կոչին` համակիրները չեն հեռանում հրապարակից, եւ նրանց շարքերն ավելանում են: