Օսիպյանը հորդորում է ցույցի մասնակիցներին, որ հենց իրենք ապամոնտաժեն բարիկադները և բացեն փողոցը

Այսօր առավոտյան Բաղրամյան պողոտայում նստացույց անող մի քանի երիտասարդների մոտեցավ Երևանի փոխոստիկանապետ Վալերի Օսիպյանը: Նա հորդորեց նրանց հեռանալ Բաղրամյան պողոտայից և ասաց, որ տևական ժամանակով պողոտան փակելը լուրջ դժգոհություններ է առաջացրել բազմաթիվ քաղաքացիների շրջանում:

«Գնացեք Ազատության հրապարակ, ակտիվ դերակատարում ունեցեք աուդիտորական հանձնաժողովում, փորձեք հայտնաբերել բացթողումները, որ հասարակությանը ցույց տաք, ոչ թե տևական ժամանակով փակեք պողոտան: Մի քանի օր առաջ մի քաղաքացի էր մոտեցել ու հայտնել իր դժգոհությունը ամբողջ բնակիչների անունից, դուք նրան դավաճան հայտարարեցիք, իսկ Օսիպյանին էլ ` սադրիչ: Գիտակից քաղաքացիներ եք, ինքներդ ապամոնտաժեք բարիկադները և վերականգնեք հասարակական կարգը»,- ասաց Օսիպյանը:

Ցուցարարներից մի երիտասարդ էլ ասաց, որ իրենք կապամոնտաժեն այն ժամանակ, երբ իրենց կողմից առաջ քաշած երեք պահանջները կյանքի կոչվեն: Օսիպյանը պնդեց, որ մի քանի հոգով կանգնելն ու պողոտան փակելը արդեն որևէ հարց չի լուծելու:

«Դուք արդեն իսկ շատ բան եք արել, դուք դա դեռ չեք գիտակցում: Բայց հիմա ձեր գործողություններով ձեր հանդեպ բացասական կարծիք եք ձևավորում: Ինչո՞ւ խումբ չեք ստեղծում` աուդիտը վերահսկելու համար, իզուր ժամանակ եք կորցնում»,- ասաց Երեւանի փոխոստիկանապետը: