Թույլ չենք տալու նման ոճով, պայմանով խոսեն ոստիկանության հետ և իրենք թելադրեն՝ հետագան ոնց անեն. Օսիպյանը՝ Իջևանի դեպքերի մասին

«Այս պահին ոստիկանական ստորաբաժանումներում  բերման ենթարկված 19 անձ ունենք, և շարունակական են լինելու աշխատանքները՝ մեղավորներին հայտնաբերելու և ողջ խստությամբ պատասխանատվության ենթարկելու համար: Մենք հանդուրժող չենք լինելու, թույլ չենք տալու նման ոճով, պայմանով խոսեն ոստիկանության, պետության ներկայացուցչի հետ: Երկար տարիներ սովոր են եղել ոչնչացել անտառը, անօրինական զբաղվել են այդ անտառի առքուվաճառքով: Ցանկացած գործողություն լինելու է օրենքին համապատասխան: Կրկնում եմ՝ թույլ չենք տալու, որ նմանատիպ տոնով խոսեն ոստիկանության հետ և իրենք թելադրեն, թե հետագան ոնց անեն,  ինչ անեն»,- շեշտեց Օսիպյանը:

Դիտարկմանը, որ ոստիկաններն իրենց լիազորությունները չեն կատարում, օրենքով սահմանված ուժ չի կիրառվում, ինչը թուլացնում է համակարգը, նա պատասխանեց. «Հանդուրժող լինել` չի նշանակում, որ ոստիկանը թույլ է: Կան քաղաքացիներ, որոնք հեղափոխությունից հետո լավ են հասկացել և ըմբռնումով են մոտեցել, որ մենք նրանցից մեկն ենք, որ բոլորի ոստիկանն ենք, անգամ՝ իրավախախտի և հանցագործի: Բայց կան մարդիկ, որոնք այդ հանդուրժողականությունը փորձել են որպես թուլություն դիտել: Ոստիկանությունը կիրառել, կիրառում և կիրառելու է ՀՀ օրենքով սահմանված ֆիզիկական ուժ, այդ թվում՝ տարբեր տեսակի հատուկ միջոցներ, եթե դրա անհրաժեշտությունը լինի»: