ԵԽԽՎ-ում ԼՂ-ի մասին ադրբեջանական ձևակերպումը փոխվեց հայկական եռամիասնության ջանքերով

ԵԽԽՎ հայաստանյան պատվիրակության ներկայացուցիչներն այսօր լրագրողներին ներկայացրեցին իրենց ծավալած գործունեությունը:

Պատվիրակության ղեկավար Հերմինե Նաղդալյանն իր ելույթում նշեց, որ հունիսյան նստաշրջանը հայաստանյան պատվիրակության համար բավականին պատասխանատու էր: Ըստ նրա` մեր պատվիրակությունը` վեց հոգանոց կազմով, ԵԽԽՎ-ում ուժերի գերլարումով աշխատեց, որպեսզի մեզ համար ոչ արդյունավետ` «ԼՂ օկուպացիայի» վերաբերյալ բառակապակցությունը փոխարինվի մեկ այլ ձևակերպմամբ:

«ԵԽԽՎ զեկույցում ադրբեջանցիները գերնպատակ ունեին` զետեղել ԼՂ օկուպացիայի վերաբերյալ բառակապակցությունը: Ադրբեջանի պատվիրակության ղեկավարը գրեթե պահանջում էր, որ «օկուպացիա» բառը պահպանվի: Պատվիրակներից շատերը պարզապես անտրամաբանական համարեցին Ադրբեջանի այս պահվածքը»,- ասաց Նաղդալյանը` հավելելով, որ մեր եռամիասյնության համատեղ աշխատանքն է տվել ցանկալի արդյունք:

«Մեր ԱԳՆ կառույցները լավ են աշխատել, մեր Սփյուռքի տարբեր հաստատությունները ևս աջակցել են` իրենց երկրներում աշխատանք կատարելով: Մեր պատվիրակության ներկայացուցիչները շատ լավ աշխատեցին: Նաիրա Զոհրաբյանն ու Վահան Բաբայանը Եվրոպայի դաշնախմբին են անդամակցում և բավականին լուրջ գործունեություն են ծավալել: Զուրաբյանը ևս հսկայական աշխատանք կատարեց: Սոցիալիստների քաղաքական խմբի հետ աշխատելու հարցում անուրանալի է Արմեն Ռուստամյանի դերը: Սոցիալիստները մեզ քսանվեց ձայն տվեցին, որն ամենաշատն է: Ժողովրդական կուսակցությունների խմբում աշխատել են Արփինե Հովհաննիսյան ու Մհեր Շահգելդյանը»,- ներկայացրեց Հերմինե Նաղդալյանը:

Նա նշեց, որ այս փաստաթղթի քաղաքական նշանակությունը բավական մեծ է: Նաև շատ կարևոր է ձեռագիր պահել կարողանալը: Նաղդալյանը շեշտեց, որ ադրբեջանցիները հետ հարված կարող են մեզ հասցնել, և մենք մշտապես պետք է պատրաստ լինենք մարտի դաշտում գտնվելուն: