Չենք կարող ձեւացնել, թե ոչինչ չի եղել. պատգամավորները մտահոգված են

Այսօր ԱԺ արտահերթ նիստի սկիզբն աչքի ընկավ լարվածությամբ. պատգամավորների մեծ մասը, կապված լուսադեմին տեղի ունեցած իրադարձությունների հետ, չէր ցանկանում անցնել օրվա աշխատանքներին ու քվեարկությանը: 

«Ժառանգություն» խմբակցության պատգամավոր Զարուհի Փոստանջյանը տեղից պահանջում էր միացնել խոսափողը, որ խոսի վարման կարգի վերաբերյալ, սակայն ԱԺ նախագահ Գալուստ Սահակյանը, արդեն իսկ հասկանալով, թե ինչի մասին է խոսելու Զարուհի Փոստանջյանը, հրաժարվեց միացնել նրա խոսափողը` ասելով, որ պետք է խոսել միմիայն վարման կարգի վերաբերյալ:

ՀԱԿ խմբակցության քարտուղար Արամ Մանուկյանը հայտարարեց. «Մի քանի ժամ առաջ Բաղրամյան փողոցում ուժ է կիրառվել հարյուրավոր մեր քաղաքացիների նկատմամբ, 237 քաղաքացի տարվել է ոստիկանության բաժանմունքներ, որոնց թվում են լրագրողներ, ովքեր իրենց աշխատանքն են կատարել, ջարդվել են նրանց տեսախցիկները, բռնագրավվել դրանց հիշողության սարքերը, բազմաթիվ քաղաքացիներ հետապնդվել են ու տարվել բաժիններ: Պահանջում ենք անհապաղ ազատ արձակել լրագրողներին և մնացած քաղաքացիներին»:

Նա հավելեց, որ, ի նշան բողոքի, ՀԱԿ-ը լքում է նիստերի դահլիճը:

Գալուստ Սահակյանը նշեց. «Բոլորս էլ հետևել ենք ու ունենք մեր գնահատականները, ցավ ենք ապրում բոլորս էլ: Համենայն դեպս, վարման կարգի հետ չէր առնչվում Ձեր ելույթը, պարզապես հարգանքով մոտեցա: Եթե այս հարցը պետք է քննարկել, շահագրգիռ կողմերին կհրավիրեմ, եթե խնդիրներ կան, փորձենք լուծել»:

ՀՅԴ խմբակցության քարտուղար Աղվան Վարդանյանը նշեց. «Դուք, պարո\'ն Սահակյան, արդեն առաջարկեցիք, այլ բան չեմ ասի, առաջարկում եմ հենց առաջին ընդմիջմանը խմբակցությունների պատասխանատուներին հրավիրել և քննարկել»:

Գալուստ Սահակյանն արձագանքեց. «Ոչ միայն խմբակցությունների ղեկավարներին, այլև ովքեր ասելիք ունեն, հրավիրվում եմ մեզ մոտ»:

Նիկոլ Փաշինյանը վարման կարգով ելույթ ունեցավ` ասելով. «Դեպքերի թատերաբեմից եմ գալիս, ուզում եմ հաղորդում տալ հանցագործության մասին` լրագրողների մասնագիտական աշխատանքին խոչընդոտելու կապակցությամբ»:

Գալուստ Սահակյանն անընդմեջ դիտողություն էր անում վարման կարգով խոսք վերցրած պատգամավորներին` ասելով, որ ինքն արդեն առաջարկել է այդ թեմայի վերաբերյալ քննարկում անցկացնել, բայց պատգամավորները ստիպում են անջատել խոսափողները:

Էդմոն Մարուքյանն առաջարկեց, ոչ թե սպասել ընդմիջմանը, այլ հենց քվեարկությունից հետո քննարկել, որովհետև չի կարելի ձևացնել, թե ոչինչ չի եղել Բաղրամյան պողոտայում, ապա` շարունակել աշխատել:

Գալուստ Սահակյանը չհամաձայնեց:

Զարուհի Փոստանջյանը ելույթի իրավունք խնդրեց, կրկին սկսեց խոսել Բաղրամյան փողոցում կատարվածի մասին, և հենց առաջին նախադասությունից հետո Գալուստ Սահակյանը նրա խոսափողը անջատել տվեց: