Հետեւից չենք ընկել, չենք կորզել, չենք խնդրել. Հովհաննես Սահակյան

ԱԺ ՀՀԿ խմբակցության քարտուղար Հովհաննես Սահակյանի կարծիքով` ավելի կայացած քաղաքական ուժերն իրենց տեսակետը նախագահական ընտրությունների մասնակցության ձեւաչափի վերաբերյալ ավելի վաղ են արտահայտում: Այս կարծիքը նա հայտնեց լրագրողների հետ հանդիպման ժամանակ եւ ընդգծեց, որ, ընտրություններին ավելի վաղ պատրաստվելով, կարողանում են դրանք ավելի ազատ եւ արդար կազմակերպել, միջազգային չափորոշիչներին համապատասխան, ինչն էլ լինելու է այս ընտրությունների «հիմնաքարը»:

Խոսելով ընդդիմության հնարավոր միասնական թեկնածուի մասին` Սահակյանն ընդգծեց, որ ժողովուրդը գտնվում է կոլապսի մեջ. ընդդիմադիր դաշտում գործող քաղաքական ուժերը չարաշահեցին ժողովրդի վստահությունը: Դիտարկմանը, թե ԲՀԿ-ն էլ չարաշահեց ժողովրդի վստահությունը, նա պատասխանեց, որ այդ թվում` նաեւ ԲՀԿ-ն` ընդդիմադիր այլ ուժերի հետ:

Հովհաննես Սահակյանը համամիտ չէ այն գնահատականներին, թե իբր ՀՀԿ-ն ընկել էր ԲՀԿ-ի հետեւից, որ վերջինս սատարեր իր թեկնածուին. ԲՀԿ-ից որոշում չեն կորզել: «Դուք բոլորդ էլ ձեր հոգու խորքում գտեք, որ մենք միշտ ազնիվ ենք եղել, մենք չենք խնդրել, չենք կորզել, որեւէ մեկի հետեւից էլ չենք չենք ընկել»,- վստահեցրեց Սահակյանը: