Արմավիրի բուժկենտրոն ևս երկու երեխա է տեղափոխվել` դարձյալ աղիքային վարակով

Տեղեկացրել էինք, որ Արմավիրի բժշկական կենտրոնում շարունակում են բուժում ստանալ մի շարք երեխաներ` նույն գանգատներով` սրտխառնոց, փորլուծություն: Yerkir.am-ին օրեր առաջ տեղեկացրել էին, որ հիվանդանոցի ինֆեկցիոն բաժանմունքում աղիքային վարակով բուժում է ստանում 15 երեխա:

Այսօր հիվանդանոցի բժշկուհի Լուսինե Զաքարյանը yerkir.am-ի հետ զրույցում հայտնեց, որ շաբաթ օրը ևս երկու փոքրիկ է տեղափոխվել հիվանդանոց` դարձյալ աղիքային վարակով: Ըստ նրա` երեխաների որոշ մասն այսօր դուրս կգրվի:

Նշենք նաև, որ դեռ նախորդ շաբաթ ՀՀ ԱՆ նախարար Արմեն Մուրադյանն այցելել էր Արմավիրի բժշկական կենտրոնի ինֆեկցիոն բաժանմունքում բուժում ստացող երեխաներին: Նախարարը հանձնարարել էր բժշկական կենտրոնի ինֆեկցիոն բաժանմունքում սահմանել մանկական ռեանիմատոլոգի մշտական հերթապահություն` սուր աղիքային վարակի դեպքում անհրաժեշտ բուժօգնությունն արագ կազմակերպելու համար: