Գյումրիում ռուս զինծառայողի սպանության գործի նյութերը չեն փոխանցվել ՌԴ-ին. դատախազ

Այսօր ռուսական լրատվամիջոցները, հղում կատարելով Հարավային ռազմական օկրուգի իրավապահ մարմիններում իրենց աղբյուրներին, հայտնեցին, որ Գյումրիում զինծառայող Իվան Նովիկովի սպանության գործը կքննեն Ռուսաստանում: Աղբյուրը պարզաբանել է, որ նման որոշում կայացվել է այն բանի հետ կապված, որ թե\' սպանվածը, թե\' սպանության մեջ կասկածյալը ռուսական բանակի զինծառայողներ են:

Հիշեցնենք, որ Նովիկովի սպանության դեպքի առթիվ քրեական գործ է հարուցել նաև ՀՀ քննչական կոմիտեն:

Շիրակի մարզի դատախազ Րաֆֆի Ասլանյանը yerkir.am-ի հետ զրույցում հայտնեց, որ մինչ այս պահը դատախազության միջոցով քրեական գործի նյութերը չեն ուղարկվել ռուսական համապատասխան մարմիններին: Նա ասաց, որ երբ այդ հարցը քննարկվի, կտեղեկացնեն:

Հիշեցնենք, որ Նովիկովի սպանության կասկածանքով ձերբակալվել է նրա ծառայակիցը՝ 21-ամյա պայմանագրային զինծառայող  Իվան Բոսխոմջիևը: